Vakarau vuki cake tale na medra bilo na Turaga na Vunivalu na Tui Kaba.

Na itutu ni – Turaga na Vunivalu na Tui Kaba,e itutu ni ulu ni veiliutaki ni matanitu ko Kubuna ka tu na kena i sema vakavanua ena vei delaniyavu cere ena matanitu e rua ko Burebasaga vei ira na Marama Bale na Roko Tui Dreketi  kei na matanitu Veiwekani Qaqa na Tovata.

Sa rogorogo na vanua ka buki na kena druadrua , sa dreu tu na kena leba ka sa vo ga me sevi ena soqo namaki ena Vakaraubuka ga oqo.

Ni mai oti vinaka e 33 na yabaki na kena mai lala koto nai tutu ni veiliutaki e Kubuna , sa liwa ka cagidonu na soko ena dela ni waisiliva ka me vakarewa talega na kena drotini me kilai e Viti kei vuravura me vaka e ratou vakaraitaka toka mai na Gone Turaga na Tunitoga kei na kena gusu ni vosa ko Aisea Komaitai , ni yabaki oqo e dua na yabaki vinaka vei Bau kei na noda Vitia.

Vakaraubuka oqo na tiki ni siga sa toqai oti tu ena ivola vivigi ni gauna mena mai vuki cake tale kina na medra bilo na Turaga na Vunivalu na Tui Kaba ni sa oti e dua na gauna balavu.

Era sa maqusa na vuvale veiwekani kei Kubuna ena nodra na mai vakatikori se vagunuvi tiko ena Vakaraubuka oqo ko Ratu Epenisa Cakobau. Era na vakaitavi tiko ena soqo bibi oqo na Turaga na Roko Tui Bau ko Ratu Timoci Tavanavanua.

A mai lala toka na itutu cecere oqo ena yabaki 1989 na gauna era a mai leqa kina na Turaga na Tui Kaba kara sa mai bale ko Ratu Sir George Cakobau.

Ena tekivu tiko e valenilotu na soqo ni veibuli se veivakatikori ena 10am ena yanuyanu ko Bau kana cabori tiko kina na bula nei Ratu Epenisa  kei na lewe ni  nodra matavuvale ki vua na Kalou bula ni bera ni vakayacori tiko na soqo ni veivaguvi kei na ivalavala kece sara vakavanua ena soqo bibi oqo.

Era cabe tale tikoga yani ki Bau na Marama Bale na Roko Tui Dreketi , ka nanumi nira na qai tadu tale tikoga yani na veiwekani vakadra vakavanua ena soqo bibi oqo.

source:Vitifm