sere vou

VOQA NI UA KEI CAKAU–Na matasere oqo ka kena i liuliu tiko o Josefa Namatua ka cavutu mai na koro vaturaga o Nagigi mai Savusavu,Cakaudrove,ka rogoci tale tikoga na domoi Lino Waqairapoa,Buka Waqairapoa,Josefa Nasau kei Waqanikalou ka dau ni nodratou vola sere o Pio Baleicoqe.

‘LEI LUSI’ – Oqo na nodrau dui talanoa na veitau ka meda rogoca mada na nodrau dui i talanoa.

SEVU– A noqu tatadra voli ena gauna au se cauravou lailai kina, me bau dua na noqu i tau gone yalewa e totoka. Au a laki vuli ena koronivuli mai Lodoni ka sega ni yali vei au niu na gadreva me keirau na veitau kei na dua na gone yalewa rairai totoka.

Ena yabaki 1990 donumaka e dua na gauna ni sereki au a gade kivua e dua na tavalequ e Suva,ka  e vakawati i Naloto Verata Tailevu, ka sureti au meu bau gade vata kei rau ena nona koro ni vakawati,ia me vaka niu vulagi yani, au raica nira tavali wavoki na gone yalewa ena mata ni neitou vale, ka au a dabe toka ka vakararai kau raica na totoka ni kedra irairai.

Mai na vale au tiko kina au raica sara ni dua na gone yalewa totoka buiniga vinaka ni basika ga mai tuba ka lesu tale,ka  mai nai rairai walega ni babana, a malele sara kina na yaloqu meu via kila se raica na matana.

Au vakataroga sara se ocei na gone yalewa koya,ia era tukuna vei au ni vuli tiko mai Delainavesi ka rau dau taqomaki koya vakavinaka sara na nona i tubutubu,ka sega ni dau laurai me lako vata kei ira na gone yalewa ia ena dau tu voli ga e vale.

Ena vica na siga au a tiko kina mai Naloto au a sasaga kina vakaukauwa meu bau raica madaga na matana,ia ena dua na mataka ni sigatabu au a dabe toka au raica e dua na gone yalewa kau sega ni rawa ni vakamacalataka rawa na kena totoka ni takoso e mata ni neitou vale. Au tucake saraga yani meu raica na gone yalewa oqo kau bau saga meu vakayadra madaga vua.

Ia e voleka ni lutu i tuba na yaloka ni mataqu ni vaka ga e cabe mai na vula ena dua na yakavi ena totoka ni kena i serau na gone yalewa oqo,ka vakavuna meu  sega ni kila na cava meu tukuna ena nona sa vosa mai, ka yali vakadua na yaloqu kau mai duri balavu tu yani. E kauta saraga na yaloqu ka sa i wewe tu ga ni noqu vakasama na kena i serau kei na kena totoka.

Au a sasagataka vakaukauwa me keirau bau veitalanoa madaga ena yakavi oya ka ena vanua talega ga oqo sa vakadeitaka kina na utoqu niu taura na gone yalewa oqo me noqu i tau ka me na yaco me noqu  daulomani.

Ni oti na neirau veitalanoa oya sa buki sara na gauna ni sota, oya me keirau laki sota e Suva ena dua na gauna,Ia mai Ratu Kadavulevu sa lailai na ka ni vuli e vakasamataki, ka sa osoya na vakasama na noqu dau nanuma na gone yalewa totoka oqo ka ni keirau dau veivolavolai ka sa tilomi keirau ruarua na wasawasa ni dodomo, ka  keirau dau sota ena so na gauna ka sa kamikamica cake tikoga na neirau veikilai.

Ni oti e vica na yabaki ni veikilai sa vakaveiyawakitaki keirau na cakacaka, ka sa malumalumu talega mai na neirau dau sota se veikilai ka au sa laki vakawati ka sa vakawati talega okoya ka sa mai cavuka na neirau veitara2 me vaka ni keirau sa dui vakamatavuvale ka sega ni qai veirogoci tale.

Au mai sotava e vuqa na dredre ena noqu vakawati kau dau vakananuma lesu na neirau gauna vinaka kei Lusi ia sa dredre ni sa vakavuvale talega ko koya. Au a vosota toka na dredre ni bula vakawati oya me yacova niu sa sasaga meu gole ki Amerika ka na yabaki 2022 au sa biubiu kina meu sa vuka kina vanua levu o Amerika.

LUSI-Sa mai yali na turaga na watiqu Ka au  a sasaga mai e Amerika ena yabaki 2019.
Ena Vakaraubuka nai ka 16 ni siga ni Sepiteba 2022, sa taqiri na talevoni mai vua e dua na tinaqu Lailai, ka kerea meu laki picktaka mai e dua nodrau vulagi ka kauti koya yani ena vale keitou tiko kina.

Au a vakarau ena mataka oya ka lako yani meu  laki kauti koya mai,ka  au raica ni yabe mai kau sega ni malele meu raica yani vakavinaka kau sa vakatotolo voli tikoga,ia ena gauna sa yaco mai kina ena motoka au a qai rai cake yani e sota na matai keirau kau nanuma ga niu tadra tiko.

E tava tukituki tuga na utoqu se o Sevu dina oqo se sega,ia Keirau veigaluvi voli mai ena neirau sega ni vakabauta ni rawa ni keirau rawa ni mai sota tu ena dua na gauna vaka  oqo,ia au sa kaya ga me keirau yaco totolo yani meu sobo ka bau ceguva eso na cagi bulabula ka vakaseavutaka talega na lomatarotaro e yacovi au voli mai.

Ia keirau sa qai mai veitalanoa kau vakila ni sa suka lesu kece tale mai na veigauna vinaka keirau a wasea vata tu ka sa toso na neirau veikilai,ka au vakavinavinaka vua na kalou ni vunia e vuqa na ka kina noda bula,ka  ke dua na ka vinaka e vunia vei au na kalou oya me kauti keirau vata mai ka mai marautaka vata na vo ni neirau bula.

I VUREVURE-Josefa Namatua

VITI FM 92FM/92.2FM/92.6FM-EKAMICAQAIKACHII