Wavivici koya toka na gata me sivia e 2 na auwa.

 Era vueta na ovisa e dua na marama ni Thailand ka wavivici koya tu e dua na gata [python] me rua vakacaca na auwa.

Arom na marama yabaki  64 a tukuni ni a savata tikoga na nona iyaya ni kana ena gauna e vakila kina ni laukati vakavica na yavana.

Kuria ka kaya na marama oqo , ni qai wavivici koya mai na gata ka vuna me bale kina ka vesuki koya toka me sivia e 2 na auwa.

Sa qai tagi ni kere-bula na marama oqo , ia, e sega ni dua e rogoca na nona kaila. Sa oti e dua na gauna balavu na nona kere veivuke tiko sa qai rogoci koya mai e dua na wekana qa qiriti ratou sara na ovisa me ratou mai veivuke.

E tukuni ni ratou kurabui madaga na ovisa ni ratou yaco yani , ratou sa raica ni sa vesuki Arom toka vakaukauwa na gata. Rauta ni 30 na miniti nodratou saga toka me ratou vagagalataki koya mai na leqa sa toka kina.

Thailand e kilai tani nira bula kina e 250 na veimataqali gata wili kina e 3 na mataqali python.

Ratou vakaraitaka na Thailand’s National Health Security office, ni yabaki sa oti , rauta ni 12,000 era qaravi ena vuku ni ikati ni gata ka 26 era mate kina.

Ena vica na macawa sa oti , a laukati talega kina e dua na turaga ena gauna a dadabe voli kina ena loma ni nona valenisili. A qai vakabulai koya ga ni a yatova yani na barasi ni savasava me mokuta kina gata. Rau qai veitalatala ga ni ratou gole mai na kena dau me ratou mai dreta laivi na gata mai na vanua sa coba toka kina na batina.

source:cnn