E DINA GA NI RAU SA LAKI VULI VOLI MAI AMERIKA IA E RAU SEGA VAKADUA NI GUILECAVA NA DREDRE NI QARAVI NA VULI ENA NODA VANUA.

E rau drua o Kalara Raituraki kei Taraivini Raituraki ,ka rau se qai yabaki 16,ka rau vuli tiko ena Year 11 ena Provo High School mai  Provo Utah,United States,ka rau cavutu mai Wainimakutu,Namosi,ka rau Vasu e Navave,Vuya mai Bua.

Ena yabaki sa oti e rau a vuli tiko e Navesau Adventist High School oirau na goneyalewa Drua qo,ka rau a se year 9 tiko,ka mani vula o Jiulai e ratou sa gole kina vakavuvale me ratou sa laki lewenivanua vakadua ena vanua levu o Amerika,ka sa dua naka na mositi rau ni nodrau vakasamataki ira na nodrau i tokani kei na dredre ni bula ni qaravi vuli me vaka ni rau a curu tu e bure,ka rau kila vinaka tu na kana vaka ca kei na moce vaka ca kei na dredre era dau sotava na gone nira curu tu e bure.

Ia,ena gauna rau laki tu voli  mai na vanua levu o Amerika rau sa qai dau tatadra taka tu ni na gauna rau na lesu mai kina ena noda vanua e rau na laki sikovi ira saraga na nodrau i caba,ia ena siga vinaka ni kua sa dua naka na nodrau marau ni rau sa mai vakarautaka sara e dua na Kuro ni Soup Toa mera vakayagataka kei ira na na nodrau i caba curu tu e Bure ena koronivuli na Navesau Adventist High School,ka vakatalega kina na vakaloma vinaka sai koya na Ice Cream,ka sa dua naka na nodra marau na gone baleta nira dau kila tu ni siga Tusiti e dau caka kina na kana Raisi Kei na Dhal.

Ena nodrau siko mai oqo e rau kauta talega mai vakataki rau na beleti ni nodra kani buli madrai na gone curu i bure me vaka ni sa oti e  8 na macawa na kena a sa ca tu,ka vakavuna sara kina me dau dredre na kena vakasaqarai na veika mera dau katalau taka na gone.

E rau a gole talega na veitacini oqo ena Koronivuli a rau a primary mai kina sai koya na Nanuku Primary School me rau laki wasea talega so na medra vakalomavinaka na gone.

VITI FM 92/92.2/92.4/92.6 FM-E KAMICA QAI KACHI!

I VUREVURE-Varanisese Raituraki