Leqa na turaga ni Irani ka bula voli ga ena iroro ni waqavuka me 18 na yabaki.

Sa qai mai leqa na turaga ni Irani ka bula voli ga ena iroro ni waqavuka e Parisi. Tukuni ni 18 na yabaki na nona vaka itikotiko voli ga na turaga oqo ena vanua ka sa wilika tu me nona vale.

Ena veika a lako curuma na turaga oqo , e vakavuna saraga me caka kina e dua nai yaloyalo ka yacana na ‘The Terminal – ka vakaraitaki kina o Tom Hanks ena 2004.

Sucu o Nasseri ena 1945 ena yasana ko Khuzestan e Irani, ka gole ki Urope ena nona vaqara na marama na tinana. Ena nona vaqaqara voli oqo , a laki vakaitikotiko sara e Belgium, ena gauna sa vakautani kina mai Peritania, Netherland kei Jamani ni sega tu vua nai vola tara donu ni curu vanua. Sa oti kece oqo , sa qai gole ki Varanise me laki vaka itikotiko tudei kina ena 2F Terminal me yacova nona mai mate.

Ena vanua ka dau dadabe voli kina, a qai vola kina o koya na nona i talanoa. Era qai vakamuria na nona italanoa na dau vola itukutuku ka mani yaco sara vei Stephen Spielberg ka laki vuna me tabaki sara kina e dua na kena iyaloyalo yavala ka rau vakaitavi kina o Hanks kei Catherine Zeta-Jones.

Ena 1999, a solia nona veivakadonui na matanitu o Varanise me baleta nona tiko. Ena 2006 a kau kina ki valenibula ena vuku ni tauvimate. Oti sa qai laki vaka itikotiko ena dua na vale ‘hostel’ ka sauma tiko ga mai na nona ilavo ka ratou solia na kabani ni caka iyaloyalo.

Ena vica ga na macawa sa oti a lesu tale ko Nasseri kina nona i tikotiko ena iroro ni waqavuka , me yacova na na nona mai leqa.

source:bbc