BULA NA SOQO NI VAKATAWASE MAI BUKUYA,MAGODRO,ENA YASANA KO BA.

E na kena marautaki na vakatawase ena noda dui tikotiko,e tu tale ga na kena i valavala ka da dui kilai kina ena noda dui Koro.Sa dau matalia dina na noda dau raica na kena se bula tiko na kena i valavala ka ra dau vakayacora tu mai o ira na noda qase.

Na koro vakaturaga o Bukuya ena tikina o Magodro,ena yasana vakaturaga o Ba,e ratou dau kilai tani ena kena marautaki na soqo ni vakatawase me ra dau borolaka i yagodra na soso,ka lako vata tu na kena marau,na gunu yaqona kei na malaude.

Na yacana vei ira na wekada mai Bukuya,sa i koya na ‘KATIQARI,oqo na kena keli na qara,qai biu kina na soso kei na wai ka ra qai dau toni kina.Ni dua e sa lako yani vei iko ka laki ‘TAMA’ yani vei iko,ka kerea mo drau laki toni,drau sa na taubale sara yani kina ‘KATIQARI’,ka drau laki toni.

E dau bula na soqo oqo,baleta ni dua na gaunisala oqo,e vakadeitaki kina na veiwekani vakaveitavaleni,ka levu na sala ni veiwekani e dau basika kina na veimositi,mai vei koya e qase duadua,me yaco sara vei koya e gone duadua.

Na yabaki oqo e duatani duadua,me vaka nia lako yani o Talatala qase ni wasewase o Magodro, kei iratou mai FNU ka ratou lako yani ena vuku ni caka vuli, eratou qai laki donuya vakadua na soqo ni vakatawase mai kea,ka a qai mai otioti ni toni ena ‘KATIQARI,na Turaga na Roko Tui Ba kei Tavua,ka vakota vakadua kina na soqo levu oqo.

E dau qai mai qaravi na kena kana magiti ni sa dau sogo na soqo ni vakatawase ka dau nona i tavi o koya ka kelia na qara ni ‘KATIQARI’e dua na bulumakau mei coi ni kakana,ka ra na qai vakasaqa talega yani na  lewe ni koro,ka laki vakayagataki ena vale va koro,me sa dau sogo talega kina na Vakatawase.

I VUREVURE – Sivo Jokini

I taba – Sivo Jokini.