CIQOMA NA GONETURAGA NA TUI MACUATA NA VEIDIGITAKI NI PM KI NA I TUTU VAKA PERESITEDI.
Written by Maria Solomone on October 21, 2021
Era sa vakaraitaka na Paraiminisita Voreqe Bainimarama na nodra sa ciqoma na Gone Turaga na Tui Macuata i tutu ni veiliutaki vaka Peresitedi ni noda Matanitu.
Vakaraitaka na PM ena nodra akaude ni FB ni ra sa na lavetaka cake ena kena dabe na palimedi ena 10 ena mataka ni mataka,na yaca i Ratu Wiliame Katonivere me ra sa na veisosomitaki vei Major General Jioji Konrote ki na i tutu vaka Peresitedi ni noda matanitu,ka sa na mai cava tiko na nodra veiqaravi ena vula mai qo.
Goneturaga na Tui Macuta-Ratu Wiliame Katonivere:photocredit:rnz
Kaya na PM ni kila ni dua na vakatulewa dredre era na vakayacora na Turaga na Tui Macuata ena vuku ni nodra na biuta toka yani na nodra i tavi ena nodra dela ni soso vakaturaga o Naduri ena vanua Vakaturaga o Caumatalevu,ia,e sega ni ra tu vakasuka ke ra gadrevi me ra na mai solia na nodra veiqaravi ena noda vanua lomani ko Viti.
E vakavinavinakataka tale ga na Paraiminisita na i tavi levu sa ra vakarau mai biuta koto na Peresitedi o Jioji Konrote,na nodra dau tutaka na veilomani,cakacaka vata ena sasaga ni toso ki liu kei na kena vakatoroicaketaki na noda vanua.
Era kaya tale ni ra kila ni Gone turaga na Tui Macuata e dua na Turaga ni Vanua ka dau tutaka na kena maroroi na noda i yau bula,me baleti ira na noda kawa ni mataka kei na nodra bula ena dua na vanua e savasava ka bulabula.
Vakarorogo tiko ga mai ena VITIFM 92fm/92.2fm/92.6fm.
source:fijivillage.
