Gauna ni tatamusuki.

Sa totolo dina na gauna ka da sa yacova tale mai na mua ni yabaki. Tuvani tu e matada na vei oga e vuqa meda qarava kei na veika eso eda vakacolati kina. Ia , ena nodra vuravura ni vuli na luveda , sa gauna ni nodra vakarautaki ira ena veitarogi lelevu eso. Na gauna ni tatamusuki ena nodra dabeca na veitarogi eso ni bera nira kalawa tale yani kina dua na ivakatagedegede ena yabaki vou.

Kalasi veitarogi ena Waidalice Primary School.

E duidui na vanua era vuli kina na luveda. So era vodo basi , vuqa era taubale taka na gaunisala sukusukura , so era takosova na vei uciwai , vuqa na luveda era taubale tu voleka ni dua na auwa mera qai yaco ki koronivuli , era vosota na tau i uca , na todra ni siga kei na veika dredre kece sara . nira guta ga mera vuli ka mera yaga ena veisiga ni mataka. Ena vica na vanua , era dau laki curu tu i bure na luveda. Era biubiu mai ena yakavi ni Sigatabu kara qai lesu tale ki vale ena yakavi ni Vakaraubuka ni sa suka na vuli. So e sega na livaliva – ia era sega ni guce na gone ena nodra sasaga me rawa na maka vinaka ena veitarogi. Meda qai rai tayaloyalo taka ni vuqa vei ira era se yabaki 6 tikoga se 7  , se yabaki ni nodra tiko vata ga kei keda nai tubutubu e vale , Ia era sa laki curu tikoga e bure ena noda gadreva mera rawati ira ena veigauna mai muri ka me dua na nodra cakacaka vinaka ka me rawa nira qaravi ira vakataki ira kei na nodra dui matavuvale.

Vakabauta ni vuqa vei kemuni na wilika tiko nai talanoa oqo – ena lako sara na nomuni vakanananu kina gauna ni nomuni vuli mai nakoro. Na veika dredre eda sotava mai kei na noda sa mai tu vinaka tu ena gauna oqo. Sa ka ga ni vosota kei na cakacaka vakaukauwa.

Mai vale , na vosota kei na buno mai vei rau na itubutubu ena nodrau sasaga mera tiko vinaka na gone. Nana ena yadra vakamataka ena kena vakarautaki nai katalau kei Tata ena kena vaqarai mai na ilavo me baleta na isau ni kakana, nai sulu ni vuli , na beki kei na veika kece sara mera vakaiyaragi kina na luveda.

Tubutubu ni Waidalice Primary School ena vakarautaki ni kedra ivakasigalevu na gone.

Ia , sa gauna ni noda tokoni ira na luveda ena nodra veitarogi tiko oqo. Vinaka vakalevu na kena vakarautaki na kedra ivakasigalevu mai vei kemuni nai tubutubu kei na dau ni veisusu. Vinakavakalevu Tata kei Nana,Tutu kei Bu,Momo ,Nei ,Tata Levu , Nana Levu  na veiqaravi vinaka.

Sa vakanuinui maleka tu yani na noda sala ni kakaburaki oqo nina toso vakavinaka na nomuni veitarogi ka me rawa sara vakavinaka.

source:atu kurumudu

pic source:Poasa Ranubu