I SEVU NI VUKA NEI PENI SOWANE KINA NONA YANUYANU MAI LAKEBA
Written by Mika Qalobula on February 6, 2023
E i sevu ni gauna me vukataka kina na waqavuka o First Officer Peni Sowane kina nona yanuyanu mai Lakeba mai na yatu Lau,ena veiliutaki nei Kavetani Seru Tailor.
Ni sa yaco yani kina rara ni waqavuka mai Lakeba,e sa waraki koya tu mai kina o nona Bu,ka sa yabaki 81,o Amelia Sowane kei na nona momo o Dr.Setareki Sowane,ka vakayacori ki vua nai valavala vakavanua,sai koya na ‘CERE’,me vakaraitaki na kena rekitaki nai sausau levu sa mai rawata ena nona sa vukataka yani na waqavuka kina nona yanuyanu kei na nona Kavetani.
E a qai vakaisulutaki ena Gatu kei na Kumi ka caka mai ena yanuyanu Turaga mai Moce,kei na salusalu ka vakatokai na SISI VONO,ka kilai talega ena yaca na ‘SISI NI LAKEBA’.
Oqo,e dua na siga lagilagi mai Lakeba,ka veibolei dina vei ira nai cauravou kei na goneyalewa,ka tu na nodra tatadra ena veika vinaka me ra na rawata ena veisiga ni mataka.
