Leqa e 20 na gone ena vakacalaka e Thailand.

Era vagalalataka na dauniveivueti na yagodratou e tolu na qasenivuli kei na ruasagavulu na gonevuli mai na basi kara vodo tiko kina ni oti e dua na coqa. Ena itukutuku tabaki , e volai kina nia qai kama talega na basi oqo. Yaco na vakacalaka oqo ena taudaku ni korolevu o Bangkok.

Era lesu tiko mai na gone ena dua na nodra gade se school trip.

E tukuni ni a soli koya yani o draiva ni basi kivei ratou na ovisa ni oti na kena yaco na vakacalaka.

Na basi , kara vodo tiko kina na gone ena gauana era lesu tiko mai kina na gade ena Vualiku kei Bangkok.

Ena dua nai yaloyalo ka tabaki , a laurai tiko kina na nona saga o draiva me bokoca na kama ni bera ni dro yani. Era kaya na raica na vakacalaka oqo ni a coqa o draiva na bai simede ka wasea rua na gaunisala ka mani kacabote kina na taya ni basi.

E totolo na kena tete na kama , ka vuqa vei ira na gone era sa tao tu e loma ka dredre tu na nodra sagai ira mai ki tuba.

Tinikaciwa na gonevuli era vueti bula kei na tolu na qasenivuli. Mai na tinikaciwa oya , 16 era laki qaravi vakavuniwai ena vuku ni mavoa.

Ratou vakaraitaka na tabana ni ‘forensic’ ni so vei ira na leqa , e sega saraga ni kilai rawa na kedra irairai. Rauta ni 23 kece na yago e ratou raica na dauniveivueti , 11 era gone tagane ,7 era goneyalewa , ka 5 eratou sega ni kilai rawa.

Se bera tiko ni vakadeitaki na yabaki ni nodra bula na gone kara vodo tiko ena basi , ia , e vakabauti tiko ni tiko mai na yabaki 3 kina 15.

source:bbc