LESU TALE KI CAKACAKA E DUA NA TURAGA TAMA NI OTI E 18 NA VULA ENA VUKU NI COVID.
Written by Maria Solomone on December 7, 2021
“Au rawa ni vakatoka ni i tuvatuva ni kalou ena noqu Vuvale”.Sa i koya qori na nodra mala ni vosa edua na turaga Tama ni vuvale ka 4 na luvena,ka cakacaka tiko ena Otela na HILTON FIJI BEACH RESORT e Denarau.
Mikaele Solomone sa tekivu ni kua ena nona vanua ni cakacaka.
E vakavinavinakataka o Mikaele na kena sa oti qo e 18 na vula na nona sa sega tu ni cakacaka ena vuku ni COVID-19 ka wavokiti keda vakarua na kena revurevu,ka sa tekivu sega ni cakacaka mai ena Evereli ni yabaki sa oti.Ia, ni kua sa kacivi tale mai me sa lai tekivu tale ena nona cakacaka.
Sa tekivu tale ni kua na qaravi tavi.
Vakaraitaka tale ga o Mikaele ni dua na bolebole levu vua na kena a mai yaco vakasauri na nona sa mai sega ni cakacaka ena vuku ni Covid-19,me vaka ni veiqaravi tiko vaka POTTER ena Otela,ka cakacaka tale tiko ga na watina vaka TOUR CONSULTANT ena ROSIE TOUR,ka rau a mai vakacegui vata ena vula o Evereli na yabaki sa oti.Ia, ena yasana vei ratou na i solisoli e vakadaberi ratou ka ratou veitalanoa vakavuvale,me ratou na toso vata tiko ga ka colata vata na dredre qo,vakabibi ena so na gauna sa na sega ni ratou na raica na kakana ka ratou dau kania tu ena gauna rau cakacaka kina,sa na sega ni voli eso na ka ratou dau vinakata ena vuku ni nodrau sa na sega ni cakacaka,ka sega ni macala na kena balavu.
Mikaele kei ratou nona lewe ni vuvale.
Esa oti e 13 na yabaki na nodra cakacaka tu ena Otela na Hilton o Mikaele ni bera ni qai mai cegu ena 18 na vula sa oti,ka sa tekivu tale ni kua.Ia, na nodra daulomani o Esther Solomone era cakacaka tu mai ena tini vakacaca tale ga na yabaki mai na Rosie Tours ni bera ni ra qai mai cegu,ka namaki me ra na lesu tale ena vula o Evereli ni yabaki vou.
E va na luvedrau ka ratou sa vuli taucoko tiko-dua e fomu 3,kalasi 8,kalasi 6,kalasi 4.
E vakaraitaka tale ga o Mikaele ni sa dua na ka na kena osodrigi tiko yani na Otela vei ira na saravanua ni kua,ka vakavinavinakataki iratou na nona lewe ni vuvale ena vuku ni veivuke eso e yaco yani ena gauna rau a sega tu kina ni cakacaka vakaveiwatini.
Varorogo tiko ga mai ena Vitifm 92fm,92.2fm,92.6fm.
