MARAUTAKA NA VUVALE NA VANIQI NA KENA MAI NABA 1 ENA TUVA SERE 100 NI 2024 NA SERE NA TARABEWA ENA VITIFM – Viti FM

E sa dua na ka na nodratou marau na vuvale na Vaniqi mai Nanivuda,Seaqaqa e Macuata,ena kena mai Cabeta nai tutu ni Naba 1 na sere na ‘TARABEWA’,ka bulia o Marika Vaniqi,ka lagata na luvena Ulumatua o Semi Vaniqi,ka se qai yabaki 15 tiko.

Na sere oqo e talanotaki kina e dua na tavalena o Gabby Lasaqa ka vakaitikotiko mai Ositerelia.

O Marika Vaniqi e liuliu ni matasere na Sea Domoni Kei Namualevu ka vuqa na sere rogo levu e ratou lagata me vaka na ‘LIVIRAKI,KUA NI LAI DEDE,PAPILONI,KATRINA, kei na vuqa tale, ka sa vakayabaki toka mai na nona sega tu ni cakava na cakacaka vakabuli sere,ka qai mai veisautaka na lomana,ena nona sa kerei koya mai o tavalena.

Sa qai solia taucoko sara ga kina na nona dina ,kei na maqosa ka mai vakavotukana sara kina ena kena mai cabeti nai tutu ni naba 1.

E vakaraitaka o Vaniqi ni kerekere oya,sa qai nanuma kina me sa vakayagataki Semi,me vaka ni a sa vakatovotovotaki koya ena 2019 ena nona i vakananumi ni nona mai vakaitavi ena CHOW GAMES,ka mai vakacuru domo sara kina ena sere na KATRINA,ka solia kece na nona vakabauta vua ni sa kila na taledi e tiko vua.

Ea qai vakatokayacataka me yaca ni nodrau matasere me ‘CAKAU NI YALO’,me vaka nia se soli sara vua na yaca qo ni se qai kalasi 5 ga o Semi.

Na sere oqo na ‘TARABEWA’,e vakaraitaka o Vaniqi,nio koya e kena tamata ga me toqa,ia,e tiko o koya e bulia ka dodonu me dau rokovi,me vaka ni qase tiko ga vei keda na noda i Vakabula,ka me da vakayagataka vakavinaka na taledi e solia vei keda.

E tukuna o Semi Vaniqi,ni kidacalataka ena nona yadra cake mai na mataka ni siga ni vakatawase ni sa tukuni vua ni sa naba 1 na sere na TARABEWA,ka sega vakadua ni vakabauta.

Sa vakavinavinakataka vakalevu o Marika Vaniqi vei keda toucoko sara ena vuku ni veitokoni kei na kena taleitaki tiko na nodrau sere na veitamani.

Ni qai sema tiko mai ena VITIFM 92.2FM,92FM,92.6FM kei na 92.4FM,ena vuku ni vei sere vovou ni matasere na CKAU NI YALO.