Na bibi ni veilomani ena bula vakawati – Marautaki nai ka 59 ni yabaki ni bula vakamau.

Eda mai marautaka tiko na siganisucu kei na tawase ni yabaki ni 2023. Levu na soqo eda na tiko kina. Vuqa na soqo eda sa qarava oti ka vica ena qai qaravi tiko ena mua ni macawa oqo.

Ia ena siga Moniti ka marautaki kina na siganisucu ni 2023, era a mai duavata talega kina ena marau na lewe ni mataqali ko Naduruvesi ena yavusa ko Daviko ena koro ko Veinuqa,Namalata , Tailevu na siga ni nodrau mai yacova nai ka 59 ni bula vakawati se vakamau na veiwatini ko Malaki Tobau kei Mele Tobau.

A dodonu me keimami dui siganisucu ga ena vanua keimami tiko kina , qo vei ira e nakoro , ira na tu ena veikoro ni cakacaka ka vakakina vei ira na lewe ni mataqali era tu ena veiyasai vuravura. Rau sa mani kerekere na qase me keimami laki marautaka vata kei rau na siganisucu ni yabaki oqo baleta eda sega ni kila tu na noda veisiga ni mataka. E vinaka ni rau se tiko raurua de rairai daumaka me keimami na laki tiko e yasadrau ena kena marautaki na siganisucu kei na nodrau vakananuma na 59 na yabaki ni bula vakamau.

Era biubiu mai na vuvale vaka Naduruvesi ka soli tu na kena draki. Totoka na veika e vakarautaki kei na nodra mai sota na vuvale kani vica sa dede era sa qai sota tale.

Ni bera ni vakayagataki na ivakasigalevu , mai dua toka na vosa nei Malakai Tobau ka vakabibitaka toka o koya na nodrau veilomani vakalevu mai na gauna a tekivu kina nodrau vuvale me yacova tiko mai na siga nikua. Kuria ka kaya ni dau vakabibitaka na nona dau dina ena nona vosa ni yalayala. Na nodrau vuvale e yavutaki ena veirogorogoci , loloma , cakacakavata kei na nodrau dau lako curuma vata na dredre e rau dau sotava ena veisiga.

Lutu na karobo me laki bogilevu mai – e kune votu na marau vei rau na veiwatini qase ni rau se dabe voli ga kei ratou na vuvale ena kena cawiri tu na wai ni vanua.

Noda bula e rui lekaleka walega – sa ka bibi na noda dau veilomani sara vakalevu.

source:kurumudu