Na bisinisi ni iTaukei kei Susana Watimaravu.

Vica na siga sa oti keirau a veitalanoa kei Susana Watimaravu e dua na marama itaukei ka taukena tiko e dua na valenikana ena taoni o Suva. E cavutu mai na koro totoka ko Naisogovau , Dravo Bau Tailevu ka vasu sara ki Nawaikama, Gau.

Meu na kauti keda ga vakalailai ki muri , ni bera ni mai dabe ena kena vanua dei na valenikana oqo a tauyavu taumada ena vale ni niu ena wavu makawa [makete] , oti, toki yani kina vanua era dau kele kina na meli, lesu tale mai na mua ni wavu , toso sara kina  DC Southern [Carrier stand] oti sara qai cabe na marama vei Ratu Penaia me laki yaco sara na nona veivuke mai na matanitu o Canada ena kena mai tara na valenikana ka koto ena makete levu e Suva ena gauna oqo.

Tauyavu na bisinisi ka qarava mai o nona Bubu ni bera ni mai vuke na marama na tinana. Dua na gauna sa mani gade ki valagi na marama tinana sa qai mai vuke o Susana.Gauna e lesu mai kina ko tinana , e kurabui ena ilavo sa maroroya rawa toka yani o koya. Dua na ka e dau raica o koya ni gauna me dau caka kina na soqo ni vuvale , e dau kau yani na itukutuku ni oga ki valenikana. E sega ni duavata kina o koya , ka kaya vei nona nana , ni tukutuku vaka koya e dodonu me kau yani ki vale.

Dua na tikina bibi ena cicivaki bisinisi , e kaya o koya ni dodonu me yavutaki vakavinaka. Mai cici vinaka tu nona bisinisi ni vakadeitaki tu ena yavu vaka ivolatabu. Kuria ka kaya o Susana ni bisinisi kece ko cicivaka e dodonu me tiko na vuana. Ka sa ka bibi gona kina na mamaroroi kei na yalomatua. Ena veisiga kece ni sa dau rawa toka e vica na sede , na imatai saraga ni ka e dau cakava oya na nona sa kumuna vata  toka ni bra ni laki baqe-taka. E dau sega ni calata na nona dau tikica vaka tikitiki na nona ikatini mai na uma i lavo e rawata ka sa vakila tu na kena mana ena gauna oqo.

E dau vakani ira na gone , turaga , marama kei na dui kaikai ka sega ni tuvaki vinaka tu na noda bula ka tukuna o koya ni sa nona i tavi ka ka va Kalou na ka e cakava nina kunea ga kina o koya na nona kalougata. Na bisinisi e dua tani ga na vanua e ciciva ka duatani na vanua e yaco ga kina na veiwekani.

Na isoqoni kece ni veika e kaya o Susana Watimaravu , sai koya mo dua na dau ni veiqaravi vinaka , mo dau mamarau , dau vosota na veika dredre ka dei tikoga ena yavu ko yavutaka kina nomu bisinisi.

source: Kurumudu