Na soqo vakavanua kei keda na itaukei

Eda sa tekivu vavaca oqo na draki ni mamarau kei na vakayaco soqo kada dau kilai tani kina nai taukei. Na kau mata ni gone kina koro nei tinadra e dua na soqo e vakaraitaki kina na nodra vaka menemenei na luveda ena nodra koro ni vasu. Dau namaki talega na soqo ni vakamau ena vanua cava ga e caka kina. Dau kena ivakarau tu me dau vakasavui na iloku ni soqo ni vo tu e vica na vula me caka kina kei na noda cakacaka taki keda yani ena siga sa lokuci kei na noda vakarautaki keda ena noda dui itavi se cau.

Ena macawa sa oti , a mai marautaki kina e dua na soqo ni tevutevu me baleti rau ko Vilive [Bond] Levanatabua kei Irinieta Levanatabua. Ko Irinieta se o Nada na yaca e dau kacivi kina e cavutu mai na koro totoka ko Sote ,Tailevu ka bula voli ga ena nona koro ni vasu e Navolau, Naitasiri. Na koro ko Sote e davo koto ena dua na delana ka ravita toka na uciwai na Waidalice , kilai tani ena kena matasere makawa na Maka ni Delana. Na koro talega oqo a ratou ciqoma na kena qase na kamunaga mei kere ni kau ka tara se tauyavu kina na koronivuli ko Sote e Delainavesi.

Era oso mai na veiwekani ena koro nei Bond e Nakalawaca , Namalata , Tailevu ena siga ni veisolevuti oqo. Vica vata mai na keria , na motoka , na minivan ka so era taubale ga mai ena kena mai marautaki na siga bibi oqo. Totoka na sulu kei na jiaba na kalavata kei na kena soli tu na draki ni soqo.

Ratou sa tevuka rawa koto na itaukei ni soqo na veika me baleti Bond ni bera ni ratou mai tevuka na iyau nei Irinieta na nona vuvale. Vakacagau na soqo kei na rogo sigidrigi me i saluwaki tu ni yaqona gunu vinaka. So, e vakaveveku mata ena sivia ni yadra-ica kei na yaqona levu ka so era kaciva na bilo levu. Toso na gauna me sa cabo na ivakatale kei na kena mai kasa nai tatau ni qaiqai ni vakarau me sa ia lesu tale na igolegole ki nakoro. Na domo ni veivakamocetaki vakavuvale kei na veiwekani e vakamosi yalo. Ia, e marau na yalo ni mai vakayacori vinaka na soqo kei na kena vakavinavinaka taki na yalo savu vei ira kece era mai duavata ena siga guiguilecavi dredre oqo. Siga cava tale meda na qai sota kina? Ia oqori ena qai tukuna ga ko gauna.

Cawiri tu na wai ni vanua ka sa tekivu lala mai na valenisoqo. Me qai bogilevu yani sa vica sara toka era se obota toka ena bulu we ni yava. Ia , ena mataka nisiga ka tarava eda qai mai rogo italanoa taka tale na cava e laki tomani ni maca mai na yaqona oya.

Meda maroroa vinaka tu ga na noda itovo ni sai koya ga oqori na veika ena tukuni keda ena veigauna.

source:kurumudu