Noda timi e vakacibi ivalu!

Ena nodra vakamuria tiko na timi ni Viti na dau vola itukutuku ena noda vuravura , vica na ka era raica rawa. Matai, nai vakarau ni qito e ratou solia na cauravou ena loma ni 80 na miniti kei na kena ikarua na ituvaki vinaka ni yagodratou vakabibi vei ratou na iyatu e liu ena nodratou ‘technique ‘ tekeniki ena gauna ni ‘scrum’. Oqo e dau malumalumu tu kina na timi ni Viti ena veigauna sa oti. Dua tale na tikina era vakamuria sara tiko vakamalua na dau vola itukutuku sai koya na ‘structure’ ni qito eratou qitora tiko na noda cauravou kani vuqa na dau sara qito era taleitaka vakalevu na timi oqo ni ra qito tu ena galala ka sega ni vaka na vei timi tale eso.

E dau kilai tu ga na timi ni Viti ena veigauna sa oti ni dau laki malumu nodra qito ena i-otioti ni 20 na miniti mera sa qai dau binia kina na kai. Ia, sa liwa na cagi tokavuki ni veisau ni vica na qito sa oti oqo , e vuqa era kurabui sara vakalevu ena veika era sarava mai vei ratou na noda cauravou.

Ena qito ni vakatakata , ratou sagasaga dredre na itaukei ni rara [Varanise] dina ga ni ratou mai qaqa ena 34-17.

Volai talega ena ivola tukutuku ni veigauna ena qito rakavi e vuravura na nodratou mai caroba na timi ni Igiladi vei. Oqo talega e se qai imatai ni gauna me dua na timi mai na tier 2 me vakadavora na timi tagane ni Igiladi, ka a sa laveta talega na bilo levu ni vuravura ena 2003.

Na sota kei Welesi ena macawa sa oti , levu era kaya ni qito oya e nei Viti ka levu era kudruvaka na vakatulewa nei koya na dau vakatagi sici.

Ena mataka caca nikua , levu era sega tu mai ni moce ena nodra waraka toka na qito. So sa vaka era bobo matai dua toka ga ena levu ni mateni ena yaqona.Vuqa era qai kida ga mai ni sa rogo na kaikaila. So era mocelutu ka mosi na yalodra. E tawa na veidelana , cegu na siwa e wasawasa , cawiri na bilo yaqona , na masu votu kei na masu vuni e cabori ni bera na qito.

Nikua e dua na mataka vinaka vei keda ka tekivu vinaka kina na macawa vou oqo ni sa oti vinaka oqo e 69 na yabaki , sa qai mai davo vakatadraicake tale na timi qaqa na Wallabies ena kai 22 -15. Ositerelia a sa laveta oti vakarua na Webb Ellis trophy ena 1991 kei na 1999. Eda vakavinavinaka ni ratou qito taki Ositerelia tale toka ga mai e vica na noda cauravou , ia na timi ni Viti sa sega tale na suka ki muri , ni ka e ratou gadreva sai koya na qaqa.

Nida nanamaki yani ena qito ka tarava , eda sa vakanuinui tu ni ratou na raica lesu na vanua e ratou nanuma na veiliutaki ni dodonu me ratou na vaqaqacotaka.

Totoka nodratou matanimeke na cauravou ena cakacakavata kei na veilomani. Vinakavakalevu Waisea Nayacalevu na veiliutaki vinaka kei na vosa ni veivakayaloqaqa taki. Vei kemudou kece na iyaraqele ni noda timi lomani , sa tu na vakanuinui kei na neimami veitokoni vei kemudou ena vo ni rua na qito sa toka e matamudou.

E marau o Viti taucoko kei ira na luvei Viti ena veiyasai vuravura ena veika dou sa mai rawata rawa nikua – E DUA GA NA SIGA NI COLAQELE.

Ia , ena gauna oqo sa gadrevi vakalevu na noda veimasulaki kei na veitokoni vei ratou na cauravou.

Mena qai tomani tale yani – me se lai tei dua mada na kena 2 bags wacala naita!

Viti tu ge , Tu gi , Tu ga.

source:Vitifm/Google