SERE VOU – BOGI AU MOCE VAKACA – WAIKATAKATA VURE E DELA NI NUKUVULA
Written by Mika Qalobula on January 16, 2023
‘WAIKATAKATAKA VURE E DELA NI NUKU VULA’ – Na matasere ka liutaka tiko ko Maciu Salauca na cauravou ni SEAVACI,VATUROVA,mai CAKAUDROVE,ka sa vakai tikotiko tudei mai na vanua levu o Amerika,ka katona tiko mai kea e so na nodratou sere vou,ia vei ratou na tiko yani ena noda vanua,e ratou tomana tiko ga na nodratou veivakamarautaki.
‘BOGI AU MOCE VAKACA’– Na sere oqo e baleta ga e dua na cauravou e lako curuma dua na Cagi tataba se ‘NA CAVA’,ni veidomoni
E a bucini ena veidomoni dina, mani toso na gauna sa tekivu me veisau nai vakarau nei vuni marama,ka vaka me sa yawaki cauravou ka sega ni vaka na veidomoni ka bucini enai matai ni gauna.
Sa qai dau lomatarotaro tuga na cauravou qo se cava beka e vuna,ka sa nanuma o koya ni baleta beka ni ligalala, se nona dravudravua,ka sa tekivu me luluqa kina na nona kauwai se dodomo o vuni marama vei koya.
Sa lai vatautauvataka nona bula me vaka e dua e ciri voli e loma ni wasa, ni biligi koya voli na uwa ni mosi!
Sa qai dau kaya lo tuga e lomana,ke a se kua ga ni rau a sota se veikilai e nai matai ni gauna,me kua kina ni tagi kei na vutugu me vaka sa mai yacovi koya tu ena gauna oqo.
E rawa nio na rogoca na sere oqo ena VITIFM .
VITIFM 92.2FM,92FM,92.6FM.
