SERE VOU – CURU SUKA NI DODOMO – EUKA MAKUTU feat TEVITA BULAI

EUKA MAKUTU & TEVITA BULAI – O i rau na turaga e rua oqo e rau cavutu mai na yasana vakaturaga o Rewa,ka rau dui lewena tiko na nodrau dui matasere,ia na sere oqo,e rau biuta vata me rau lagata vatakina ka sa bau totoka dina ni da rogoca na veilomani ni domodrau.

Title: Curu Suka Ni Dodomo
Composer: Euka Makutu
Vocals: Euka Makutu & Tevita Bulai
Sound Engineer – Adriu Saranuku
Music & Vocal Mastering – Euka Makutu

Talanoa Ni Sere

Oqo e dua ga na talanoa ni dodomo ka mai voca koso, ena vuku ga ni nona mai vakaleqa o goneyalewa na nodrau veitalanoa ni veidomoni ni oti toka e 5 na yabaki ni veikilai.

Sa sere dali na nodrau waqa ni veidomoni ena nodrau a mai sota vakacalaka ena dua yakavi, ena gauna ea suka mai kina ena cakacaka ko cauravou ena otela ni saravanua ka veiqaravi voli tiko kina mai Nadi.

E cauravou ni Nadroga o tagane ka rau a sota kei goneyalewa ena gauna ni sereki levu ena loma ni taoni mai Nadi,ka yaco me rau veikilai sara,ka vakaraitaka o goneyalewa ni cavutu mai Vanua Levu.

Ia,me vaka ni donuya tu na sereki levu ni vuli,ka se vakacagicagi sara tu ga o goneyalewa,ka waraka toka na nona na ladeva na vuli torocake ena yabaki ka tarava.

O cauravou e tuberi mai ena dua na vuvale ka rawati koya vinaka saraga,Ia,o goneyalewa e mai tiko vakararavi voli tiko ga ki vua e dua na wekana ena yasayasa vaka Ra.

Ena vuku walega ni nona talanoa o goneyalewa, e a siwati cauravou saraga kina ka mai vakavuna me malele kina vei koya ka domoni koya kina o nona Dreu,ka sa  bolea o cauravou me qarava kece na nona bula o goneyalewa, me vaka ni sa rui domoni koya dina mai loma.

E sauma na nona curucuru ni vuli, me yacova sara ni rawata na nona koroi,ka volia kece na nona yaya ni tereni ni qito, me vaka ni goneyalewa dau qito talega o goneyalewa, ka me lai yaco sara me lai matataka talega na noda vanua.

Ena gauna e rau soko vata voli toka mai kina, e yalataka o goneyalewa ni na tinia ga na mate na nodrau veitalanoa ka sa laki duguci rawa sara ni se qai oti toka ga e 3 na yabaki ni veitau,ka sala muria tiko ga na nona sa na vakavakarau tiko o cauravou ena vuku ni veiqaravi ka sa kacivi kina,ka yalataka vei gone yalewa ni rau sa na mai vakamau ni oti e 2 na yabaki na veiqaravi mai kea.

Ni sa tiko mai Igiladi o cauravou,sa vaka me luluqa na veitaratara,ka sa levu nai talanoa kei gone yalewa sa laki rogoca,ena nona sa butu cala tiko,ia,e sega vakadua ni vakadinata,ka nanuma me na mai tara saraga na we ni i vako.

Ni oti 2 ni yabaki ni nona tiko mai yasana dua o tagane,sa qai gole tale mai Viti me rau sa mai vakamau ka qai mai suruta wale na vusi ena kena sa mai daro na ka kece baleta ena gauna e qai gole yani kina  vale nei goneyalewa, ka sa tiko tale mai loma ni vale o nona karua.

E vinakata o cauravou me biu na vosa qo na Tagimoucia baleta ni sega  vakadua ni na guilecava o cauravou nai tovo e cakava o goneyalewa.

E vica nai Vosavosa Vaka-Viti o na rogoca ena sere qo ka sa koto vata oqori na kedrai balebale,ka semati ki vei rau na veitau oqo.

1. Wili na toa ni sebera ni lei saulaki – yalataka e dua na ka ni sebera ni yaco mai na kena gauna.

– E YALATAKA O YALEWA NI NA WARAKI TAGANE ME YACOVA NA NONA LESU TALE MAI VITI, ME RAU NA QAI MAI VAKAMAU.

2. Voleka na koro qai ca na kuro – voleka ni rawata na ka e saga qai soro koso.

– VAKANUINUI TU MAI O CAURAVOU NI RAU NA MAI VAU, QAI MAI CALA NA TATADRA NI SA TAWA TALE TIKO NA MATAI ADI QAI SA TAWANI TALE TIKO NA NONAI LOKOLOKO.

3. Tagica na yaloka ni mata ni vonu – tagicaka se vinakata na ka e rui dredre.

– TAGI CAKA KA MASULAKA VOLI TU KI VUA NA KALOU NA NODRAU BULA NI VEIDOMONI. ME NA LEI YACO SARA ME NA LEI VAKAVOTUKANA, QAI MAI MAUMAU WALE TU.

4. LUTU ENA QARA NI ISUA – e dua na ka e lutu se yali ka yali sara vakadua.

– 5 NA YABAKI NI NODRAU VEITALANOA TU MAI E MAI MAUMAU WALE TU.

5. Vaka e tiri na wai ena dela ni drau ni dalo – tukuni vua e dua na ka qai sega ni vakayacora, se sa sega ni dau via vakarogoca na vakasala e soli.

– DAU KEREA O TAGANE ME RAU DAU VEIQIRITI SE VEITALANOA NA GAUNA RAU DUAVATA KINA, QAI DAU WARAI NI DAU SAUMA MAI O GONEYALEWA NA GAUNA E RAU A DUAVATA KINA. QAI DAU KILAI I MURI NI LEI BUTU KAI, SARA CINA E KORO TURAGA SE LEI VAKASOSO YAQONA TALE TU MAI DUA NA VANUA.

6. I butubutu madrali – soso, sikisikidara na matanivuvale ena levu ni cauravou e lakova tiko yani na mata ni vale.

NA LEVU NI VEISURETI, VEIMURIMURI VAKA LAWALAWA KEI NA LEVU NI CAURAVOU ERA MALELE VEI GONEYALEWA, E LAI YACO SARA KINA ME LAI SIKALUTU TALE KINA O GONEYALEWA. QAI MANI YACO SARA ME LAI TAWA KINA NA MATANA KA SEAVU TANI NA NONA DOMONI NONA TURAGA DREU.

7. Vuka Nona Lulu – itutu vakaloloma e tu kina e dua ni sa kau tani vakasauri vua na ka e dau vakaukaua taki koya.

Esa na nonai kaukau lesu na kavoro, mavoa, mosi, tagi kei na yaluma. Na vuna ni sa mai kau tani vei koya na nona sui ni sarisari kei na matai ni goneyalewa ea domona.

VITIFM 92.2FM/92FM/92.6FM/92.4FM – E KAMICA QAI KACHII!!

I VUREVURE – EUKA MAKUTU.