SERE VOU-MATANICIVA-CAGICOWIRI KEI AOTEA
Written by Samuela Turagatani on May 7, 2024
CAGICOWIRI KEI AOTEA- Na matasere vou ratou lewena tiko e lewe tolu na veitokani ka ratou vakaitikotiko mai Wellington e Niusiladi. Na yaca ni matasere na Cagicowiri kei Aotea, kena i liuliu tiko ko Esava Tiko ka vola ka bulia tale ga na kena lagalaga ni sere na Mataniciva. Lewena tale tiko ga na matasere oqo ko Deni Caucau vata kei Uraia Cokanauto. Kenai vakatagi maqosa sa qai mai biuta vata o Manu Railoa.
MATANICIVA- Na talanoa ni sere qo na mataniciva e baleta tiko e dua na cauravou ka sa vakaitikotiko mai valagi. Na cauravou qo dau tutu voli ga mai na koro ka dau gole ga ki Suva me lai cakacaka ka soko e na waqa ni qoli. Qai rau dau mai veivosaki tiko vata kei dua na goneyalewa ka se vuli tiko e na vuli torocake. Solia kece o cauravou na nona dina vua na goneyalewa io sega ni kila ni vakagusu wale tu ga na nona domoni koya tiko o goneyalewa. Sa yaco na gauna me sa rawata kina o goneyalewa na nona vuli ka donua tale ga ni sa sega soti ni levu na cakacaka e na waqa ni qoli sa mani mai sega tu ni cakacaka na cauravou qo. Sa tekivu tale ga me sa sega soti ni kauwataki cauravou o goneyalewa mani yaco sara me biuti cauravou.
E kauta vakadua na yaloi cauravou o goneyalewa ka voleka sara me lai leqa tale kina na cauravou qo e na kaukauwa ni nona domona na goneyalewa oqo ka sega ni tara rawa o cauravou na mavoa ni yalona. Kerei goneyalewa vakavica me lesu mai sa sega ni rawa. Sa mani nanuma na cauravou qo me sa toso ka tosoa nona bula me cakava e dua na ka me vakaseavu taka na mavoa ni yalona. Sa mani gole ka sa lai cakacaka i valagi, toso vinaka sara, yacova me sa rai lesu mai o goneyalewa ka sa raica ni sa toso sara o cauravou ka mani kerea o goneyalewa se me rau veivosaki tale mada. Mani sauma o cauravou ni sa sega ni rawa ni qai lesu baleta na mataniciva a tu ga e matana ka mai vakawalena tu. Sa dredre tale ga me na qai lesuvi koya baleta ni sa tiko tale e dua na nonai tau ka sa tatau ga vua na goneyalewa me lotu ga vakavinaka ka masulaka me dua na tagane vinaka me rau na sota baleta sa na sega ni rawa ni qai lesu.
VITI FM:92.2/92.4/92.6/92.0 FM-E-KAMICA-QAI-KAJI
I VUREVURE-CAGICOWIRI KEI AOTEA
