SERE VOU- VOQA NI BARAVI KEI MUA – KAMINIELI ARIA

Na matasere na ‘VOQA NI BARAVI KEI MUA’,e dua na matasere ka ratou cavutu mai na koro vakaturaga o Vatulele,Wailevu East,Cakaudrove ka liutaka tiko o Kalivati Muriatabua Takala.

E ratou lewena tale tiko na matasere oqo o  Elia Droga,Mesulame Vakacegu kei Tubuna,ka sa levu sara na sere e ratou sa katona vata oti.

Na sere kei Kaminieli Aria e talanoataki na nona veika e a yaco ena tikini siga ka sa kacivi koya kina na tamada vakalomagi.Ena 2019 eratou a gole mai vakaveitamani mai Nawaka mai Nadi,me ratou laki biuta na luvedrau gone yalewa ena koronivuli na Adi Cakobau School,mai Sawani.E draiva tiko mai o Aria ka ratou yaco vinaka sara e koronivuli,ka mani mua lesu tale nai lakolako kina yasayasa vaka Ra.Ia,ni sivi vakalailai ga yani o Navua,sa vakila mai o koya e dua na mosi ni ulu kaukauwa.Sa bibi sara ga na mosi ni uluna ka sa mani vakelea vakatikitiki e bati ni gaunisala na motoka ka ratou sa veitagicaki na nona veitinani,ni sega ni dua veiratou me kila tu na draiva,me cicivaki koya lesu tale mai ena vale ni bula e Navua.E sega ni dede na nodratou kele toka sa kele talega yani e dua na mini- bus ka vodo tiko kina e dua na marama ka kilai ratou,ka mani sobu sara ka draivataki ratou lesu kina valenibula e Navua.Ia,ni ratou sa yaco yani i Navua,sa tukuni mai vei vuniwai me sa na cicivaki sara ki Suva ena vuku ni bibi ni mate,ia nai lakolako oya,sa kaci koso kina na Tamada mai lagi.

E rawa talega nio rogoca ena VITIFM 92.2FM,92FM kei na 92.6FM.