SERE VOU – VUJUHAHA – VADRA BOI YAWA KEI YADUA
Written by Mika Qalobula on March 5, 2024
‘VADRA BOI YAWA KEI YADUA’ – Na matasere qo e ratou cavutu mai ena koro vakaturaga o Yadua,Cuvu mai na Yasana vakaturaga o Nadroga,ka ratou a se katokatoni sara ena 2015 ka sa oti qo e 9 na yabaki,ka ratou sa qai vakanananutaka tale me dua tale mada na katokatoni, ka me se tei vakayagataki tale mada na taledi ni lagasere.
E liutaka tiko na matasere qo o Mesake Jiale ka vola ka vaqaqanataka na sere vou qo ka lagasere tale tiko ga ena matasere oqo.
‘VUJUHAHA’- Nai balebale ni vosa vaka Nadroga qo ni ‘SA MOSI TU GA’,ka ratou mani biuta kina me yaca ni sere vou qo.
Oqo e talanotaki kina na nodrau veidomoni e dua na cauravou ka cavutu mai na yanuyanu bulabula mai Taveuni,kei na dua na nona marama Tau mai Gau,ka rau a vakaitikotiko ruarua mai Nadi,ia,e rau a sota ka veikilai ena i vola mata.
Ni sa laki sivia e 6 na vula na nodrau veivosaki tiko enai volamata,sa kerea sara na gone yalewa ni Gau ke rawa ni rau sota mada me vaka ni sa qai kamikamica cake tiko ga mai na nodrau veidomoni ena kena kaukauwa taucoko.
Nai matai ni sota oya e sa vaka me sa qai gasagasa tiko ga vei rau ka sa vakavuna me sa rau dau sota sata tiko vakawasoma ka vakaukauwataka tiko na nodrau i sema,ka rau sa lokuca talega e dua na tiki ni siga me rau sa vakamau.
Ia,ni se bera sara ni 1 vinaka na yabaki na vakawati,sa drotaki tale na gone yalewa ni Gau qo,ka sa dua na ka na kena mosi vua na cauravou ni Taveuni me vaka ni solia kece na nona dina ena nona vakarautaka na veika ni nodrau soqo ni vakamau,ena kakana,nai yau ka sa mai lusi wale tu,ka sega ni tukuni rawa na rarawa levu e sotava kei na nona vakadinadinataka nai tovo torosobu sa mai vakayacori vua.
Ni oti toka e 3 na yabaki rau mani sota vakacalaka ka kerea tale o yalewa me rau veilesuvi tale,ia,e qai tukuna vua o cauravou ni, na vakawati e sega ni kani vaqitoqito,ka dua na ka e na tinia ga o mate,ka sega ni dau mai tagutuvi tu me vaka oya.
E qai vakasaga vakaukauwa na gone yalewa ni Gau qo na veigaunisala kece kei na ka me bacani koya kina me rawa ni rawati koya tale kina,ia sa sega tu ga vua na cauravou ni Taveuni qo ka sa vakanadaku ko Rokola.
E dua nai vosavosa dau tukuni ena yasa2 vaka Ra- ‘MOCE QI SA LA’,-.ka qai mani kerei au kina na cauravou ni Taveuni qo me volai e dua na kena sere ena vosa vaka Nadroga, baleta ni dau vosa rogorogo vinaka ki vua.
Oilei na VUJUHAHA
VITIFM 92.2FM/92FM/92.6FM/92.4FM – E KAMICA QAI KACHII!!
I VUREVURE – MESAKE JIALE
