SOLI NA I VAKARO NI WALUVU KEI NA CAGI KAUKAUWA, NI SA VUKI ME DUA NA CAGILABA O TROPICAL CYCLONE KEVIN VOLEKATI VANUATU.
Written by Maikeli Radua on March 2, 2023
Source: Fiji Met Office
Ni sa volekati Vanuatu tiko mai ena gauna qo o Tropical Cyclone Kevin, e sa soli tiko yani kina qo na i vakaro ni tau bi ni uca ena Vualiku kei Ba, Ra, Nadi, Lautoka, na colo kei Ba,Nadroga – Navosa,Sigatoka ,Kadavu,veiyanuyanu lalai eso,Yatu Yasawa,Mamanuca,Yatu Lau kei na Yatu Lomaiviti.
Sa soli tale tikoga yani qo na i vakaro ni cagi kaukauwa ena vanua mamaca e Nadi,Lautoka,Ba,Yasawa kei na Yatu Mamanuca.
Na ua ni draki suasua 09F (TD09F) sa laki vuki me dua na cagilaba Category 1 ena gauna qoka sa yacana o Cyclone Kevin ka sa laki laurai toka ena 480 na kilomita ena Ra ni Vua- i – Ra kei Santo.
O Tropical Cyclone Kevin esa laurai ni sa toso tiko vaka kina Ceva – i – Cake ka tiko na kena totolo ena 7 na kilomita dua na yauwa, ka namaki me na raviti Santo, viavia rauta ni 200 na kilomita ena Ra ni Ceva – I – Ra ena 6 na kaloko ena mataka lailai ni mataka.
Na totolo kei na kaukauwa ni nona toso tiko qo o Cyclone Kevin ena rawa ni na vuki me Category 2 ena dua na gauna lekaleka qo.
Kevaka ena mani toso kina Ceva ni Ceva – Ra kei Viti ena vakilai na cagi kaukauwa ena vanua mamaca ena Yatu Yasawa,Mamanuca,Nadi,Lautoka kei Ba ena kena totolo ena tiko sara 45 na kilomita dua na yauwa ka na rawa ni tosocake sara kina 80 na kilomita dua na yauwa vakatekivu ena bogi edai.
Na mataqali cagi kaukauwa vaqo ena rawa ni musuka na veitaba ni kau,vakacacana na kakana ena i teitei, ka vakacacana eso na i tikotiko ka ra sega tu ni tara vakavinaka me vakataka na vakatunuloa kei na veivale era sega ni vako tu vakavinaka se tabikai vakavinaka.
Ena vakilai na tau bi ni uca ena Yatu Yasawa,Mamanuca kei na Vualiku kei Ra, Nadi, Lautoka,Ba,Colo kei Ba,Nadroga – Navosa,Sigatoka,Kadavu kei ira na veiyanuyanu lalai eso,Yatu Lau kei na Yatu Lomaiviti.
Vakarorogo tikoga mai ena Vitifm 92.2FM/92.6FM/92.0FM ena kena i tukutuku matata.
