VAKAVOTUKANA NA TATADRA NEI MOSESE NAURA-VANCOUVER 7s
Written by Maria Solomone on February 15, 2025
Mosese Naura kei ratou nona lewe ni vuvale:photo-Fiji Rugby
Mai vakavotukana nona tatadra na cauravou yabaki 21 mai Navatusila,Navosa o Mosese Naura ena nona sa mai kacivaka na yacana na dau ni veivakatavulici ni timi ni Fiji Airways Men’s National 7s o Osea Kolinisau,me na lewena na timi ni Viti le ya vitu ki na sotasota ni Vancouver 7s.
Mai kacivi o Naura me lewena na timi vakarautaki ki na Vancouver 7s ni oti na sotasota ni Coral Coast 7s,ka vakasakiti sara kina nona qito.
Kacivi tale ga na kavetani e liu,Jeremaia Matana kei Waisea Nacuqu ena timi,ka lutu na yacai Suliano Volivoli ena sotasota i Vancouver.
Sa ratou biubiu na timi ena mataka qo.
Yacadratou na cauravou- Joji Nasova, Sevuloni Mocenacagi, Vuiviyawa Naduvalo, Terio Veilawa, Joseva Talacolo, Ratu Filipe Sauturaga, George Bose, Ilikimi Torosi, Sakiusa Siqila kei Tira Wilagi.
Vancouver 7s ena tekivu ena Vakarauwai mai qo ki na Moniti na i ka 24th.
Viti ena sota kei Uruguay ena 7.18 na mataka ni Vakarauwai mai qo, USA ena 12.45 na sigalevu ni Vakarauwai ena i karua ni sota vakatobu kei Spain ena 6.52 mataka ni Sigatabu.
Na kuata fainala ena 12.51 sigalevu ni Sigatabu,semi fainala ena 8.30 mataka ni Moniti kei na fainala ena 1.05 sigalevu ni Moniti.
Vakarorogo tiko ga mai ena VITIFM.
