VINAKA NASI SARAFINA.
Written by Maria Solomone on January 27, 2022
Sa levu sara na Nasi nuidei nodra veiqaravi ena tabana ni bula e Viti. Vakasakiti ka sega ni vakamelei rawa na totoka ni nodra veiqaravi uasivi nai sala vulavula mai valenibula. Dua vei ira o Nasi Sarafina Turagakacivi, ka veiqaravi sega ni cegu donuya na tuvuka ni kena veitakavi kaukauwa na Covid 19 ena noda vanua. Sa dua dina na bolebole levu vua.
Nasi Sarafaina Turagakacivi kei na nona i tokani Vakacakacaka:photocredit:MOH.
O Nasi Sarafina e cavutu mai Naqali, Lomaivuna, Naitasiri ka vuli mai Naqali District School ni bera ni dewa ki Namosi Secondary School. Ki Tamavua, sa qai laki vuli yabaki 3 ena Fiji School of Nursing (FSN). E dau nona tatadra ga mai ni se gone me nasi ena rumu ni veisele.
E levu sara na vanua e vakataleva ena vuku ni cakacaka. E kaya Nasi Sarafina ni veika ka yarataka mai o Covid e yavalata sara ga na noda minisitiri ni bula vakabibi ni sega soti tu ni veiceguvi ena gauna oya nai yaya ni veiqaravi era tu.
Ia, esa taura ga na yalo bolebole ni veiqaravi dina vaka-nasi ka sega ni via gu ce. Ai tavi nei Nasi Sarafina me dau qaravi ira ruarua na tauvi COVID-19 kei ira talega era tauvimate ga yani vakadodonu. Sa qai wasei ga na vanua mera dui gole kina na tauvimate. Sa rabailevu sara na kila-ka vakanasi ena gauna ni kua ka ni ra sa dui biu sara ga mera veiqaravi ena vanua era matau kina, ni veidutaitaki kei na gauna makawa e vakarabailevutaki kece tu ga na nodra veiqaravi.
Esa Nurse Unit Manager ena rumu ni veisele e CWMH ena gauna qo o Nasi Sarafina. Sa vakavotukana vinaka sara na nona tatadra. 3 na yabaki mai Vunidawa Health Centre Naitasiri ena 1995, dewa sobu ki Tavua ka lesi tale ki na Lautoka. Dewa lesu ki Naqali ena 1998 ka dewa mai ki valenibula levu e Suva ena 1999. Sega tale ni qai rai lesu.
Ena 2015-2016 ea digitaki o Nasi Sarafina me lai veiqaravi vei ira na noda mataivalu ki Golan Heights mai Syria me yabaki dua. Rabailevu nona kila-ka mai na tauri icula ki na tauri dakai. Sa na tiki tu ni nonai talanoa vei ira na luvena kei na makubuna na veivanua eso e veilesiyaki kina ka vakauti koya tu na cakacaka vaka-nasi ena rumu ni veisele.
Vakarorogo tiko ga mai ena Vitifm 92fm,92.2fm,92.6fm
source:MOH&MedicalServices.
