6 NA YABAKI KI VALENIVEIVESU EDUA NA DAUTEITEI MAI SERUA NI TEIVAKA E 1,210 NA VUNI MARIWANA.
Written by Maikeli Radua on February 28, 2022
Dauteitei yabaki 41 o Osea Kiliraki.
Esa mai tau na kena i totogi edua na dauteitei yabaki 41 mai na koro Vunaniu Serua, me sa yabaki 6 ki valeniveivesu ni oti na nona vakadinadinataka ni a teivaka e 1,210 na vuni mariwana.
Vakadinadinataka o Osea Kiliraki na cala e beitaki kina.
Yaco na cala qo ena i matai ni siga ni Jiulai kina Okotova ena yabaki 2020.
Ea vakatauci taumada na i totogi me yabaki 13 ki valeniveivesu o Kiliraki ka qai musuka sobu o turaganilewa Salesi Temo, musuki edua na yabaki baleta ni vakadinadinataka na cala e beitaki kina, musuki tale edua na yabaki baleta ni se qai matai ni nona cala, ka musu tale e dua na yabaki baleta na balavu ni gauna a wawa veilewai tiko kina e loma ni valeniveivesu.
Qai musuka tale e 4 na yabaki o Turaganilewa Temo baleta ni a veivuke o Kiliraki vei ira na ovisa ena gauna ni nona vaqaqai ka kauti ira saraga na ovisa kina nona i teitei.
E vakaraitaki ena mataveilewai ni vuni nona tei maraiwana baleta ni sa lako curuma o koya edua na gauna ni bula dredre vakailavo.
Kena i tukutuku matata vakarorogo tikoga mai ena VitiFM 92.2FM/92.6FM/92.0FM.
Reader's opinions
Continue reading
