SERE VOU-YALAVOU-NASIO DOMONI
Written by Mika Qalobula on May 17, 2024
NASIO DOMONI-Na matasere rogolevu sara e na noda vanua, ka vuqa na nodratou sere ko ni dau rogoca tiko e na nomuni sala ni kakaburaki na Viti Fm.Na sere oqo na “YALAVOU” e nodratou sere makawa na Senicevuga Ni Yalavou ka toqa ka vakaqaqanataka ko Jalesi Tuamoto, ka vakavinavinaka talega vei ratou na cauravou ka lewe ni matasere ko Waqawaqa Jrk Sailosi ,Seru Tawake ,Jofiliti Sucuvou e na domo rogorogo vinaka , ka vaka kina mai na vakatagi uasivi mai na Rose Studio.
YALAVOU-Na sere oqo e bibi na i talanoa kei na yalo ni sasaga era cavu tu mai na veiyasana e Viti me ra laki cakacaka e na Vanua vaka Davutukia e na tai ni wai na Sigatoka. E ra talanoataka tiko na kena tauyavu na vanua ni susu manumanu e na dua na gauna na Yalavou Beef Scheme. Levu vei Ira na qai mai veiqaravi kina era sa matau tuga na raica na waitui kei na kania na kena sasalu, ia oqo me ra mai sotava tu na veidelana sukusukura, na kena buca kei na todra ni siga me taubaletaki me vakadavori na kena bai ni susu manumanu, ia me qai ra toqa tiko Yalavou vei au e ca na suka se sa gunu ca na suka e vakaraitaka na bibi ni cakacakavata kei na yalovata. Kevaka e da yalovata ka cakacakavata, e na sivia na kamikamica ni suka na noda cola I tavi.
E ratou cavuta talega na vakavinavinaka e na vanua vakaturaga ko Davutukia kei na veivanua Vaka Turaga ka sega ni cavuti nodra lomani, maroroi ka susugi na liga ni veiqaravi e Yalavou ka ra sa vua ka dewa tale yani e na veiyasai viti na nodra veiqaravi.
E vakatoka oqo na qaqa ni sere oqo:
Lyrics
Veikau tubu bulabula
Drokadroka na lomani buca
Uciwai kudukudua e drodro malua
Veidelana veitokaitua
Ubia Tu na kabu ni vanua
Yalavou Isa Yalavou na noqu vanua
Kena seva niu mai Tu yawa
Ena loma ni veidelana
Kauti au mai ki ke na cakacaka
Sala ni bula vei kemuni
Kei Ira na luvemuni
Tiko Vinaka mai muri ena nomuni
Chrs
Senikau ni bula tukuni ni veigauna
Yalavou vei au e ca na suka
Au bolea na gunuwai
Vakacegu ena muri mai
Au vosota Tu na siga ena caka bai
Kena I kuri na veidelena
Au cabeta ena veimataka
Usutu duadua ga na yalovata
VITI FM:92.2/92.6/92.4/92.0 FM-E-KAMICA-QAI-KAJI
I VUREVURE:NASIO DOMONI
Author
Mika Qalobula
Reader's opinions
Continue reading
![Thumbnail](https://vitifm.com.fj/wp-content/uploads/2024/05/bc5f4860-1576-11ef-976f-87c9f89e656e.jpg.webp)