CAVUI SAUSAU ENA US NAVY NI MERIKA O CAUCAU

Boi tuvusa yawa koto na seni tagimoucia ka coriti vakamatau na kena salusalu me taubena toka ko Adi Titilia Maramakaibau Kadre Caucau mai keba ni mataivalu e wai mai Chiicago e Amerika. Rui qoroi na kedrai rairai na lewe ni US Navy vovou ena nodra foleni vakaivalu ena Vakaraubuka ka vakasakiti sara ni maliwai ira toka e dua na noda goneyalewa ni Viti. Nai vo vo ga ni dua nai ka tolu ni wiliwili era foleni, sa kenai balebale ni kena vo ni wiliwili era sa guce koso ka vakasukai lesu ki nodra. Rogo nodra kaila kei na vakasausau nai tubutubu, na mata veiwekani ena soqo namaki qo mai Greatlake Naval base, ena vualiku kei Chicago.

O Adi Titilia e cavutu mai na koro vakaturaga o Vuna, Taveuni ka vasu ki Vadra, Moala mai Lau. E luvedrau o Ratu Peni kei Naomi Caucau ka se qai yabaki 19 ga. E sema vakadra ki Mua, Batiki Lomaiviti ka ni makubudra dina na marama Minisita vakacegu Adi Asenaca Caucau. E makumudra vakarua talega na Turaga bale na Toranibau ka Peresitedi vakacegu ni lotu Wesele e Viti kei Rotuma sa bale ko Ratu Isireli Caucau. E a tekivu vuli kalasi dua mai Walkervale State School mai Ositerelia, dewa ki Viti ena Nehru Primary ka laki vakaotioti e Veiuto Primary qai lade sara ki Suva Grammar. Kalougata nona vuvale ni ratou butuki Merika mai ena vula walu ga sa oti ena vuku ni green-card.

Nodratou tadu mai vakavuvale ki California, e dau makututaka me dau tomani nona Nau lailai ena nona qaravi e dua na turaga ni Merika yabaki 101 ka Pailate makawa ni US Navy. E dau laki vakadigova dede nai taba ni waqavuka ni valu era lili tu e lalaga ni vale o Adi Titilia ka sa tekivu buroro malua ki vuniyalona na kauwai mesa na vuli Navy talega. E goneyalewa yalomalua ka yalomatua, e gone nuitaki ka dei nona vakabauta na Kalou. E bau qisi koya na lotu me laki vunivola vakalekaleka ena San Rafael United Methodist Church ni bera nona sasaga ki na mataivalu e wai.

E kaya o Adi Titilia ni sega soti ni dede na nona saga me curu ki na vuli Navy ka ni vica wale ga na siga e pasitaki kina na ASVAB (Armed Services Vocational Aptitude Battery Test mai Sacramento, 2 tale na siga na dabeci ni veitarogi kei na fitness test. Kena mataka ga ka tarava sa vuka sara ki Virginia me sa tekivu na keba. Ni vakacagau toka nai ka tolu  ni macawa ni vuli valu, mani rau veiqiriti sara vakaveitinani. E kaya na marama tinana ni vaka e veivutunitaka nona solia na luvena me gole. Oqo e baleta wale sara ga na kena mositi koya na levu ni dredre e wasea toka vua ko Adi Titilia ena talevoni. Na draki kudukuduwa mai Chicago, rui batabata sara. Ena so na bogi e dau tuturu vakayauyau na wai ni matana ni nanuma lesu na dakoba ni nonai davodavo mai vale, ia ena keba e sega soti ni moce vinaka ka sautanini ena levu ni liliwa. Dua na gauna sa bobota mai na qeteqete ni yavana mai nai vava oso e dau daramaka. Me vaka ga ni goneyalewa galugalu, sa dau galuvaka ga me tokara ki yavana ka vosota lako na kena mosi.

Vakavuqa me vovotu vua na vakasama ni vakasuka qai dau tao ga vua na matadrau na nonai tubutubu lomani, na matadra nai soqosoqo ni lotu ka ra talaci koya mai vakalotu kei na matai nona Nau. E dua talega nai nuinui levu vua ni dau ciqoma nai vola se pasela e dau vakau yani . Era kaya eso ni kevaka e rawata rawa na vuli valu ena draki liliwa o Adi Titilia, sa kenai balebale ni sa na dua dina na lewe ni mataiwalu e wai qaqa ka kaukauwa. Sa rawata ga na masu, e kaya na marama na tinana ka ni veiya 6 taucoko na auwa ena veisiga yadua, e dau cabora kina na bula nei Adi Titilia ki vua nai taukei ni bula. Meda kakua talega ni guilecava nio Adi Titilia e sucu vula vitu mai ka solia eke e dua na bolebola levu veikemuni nai tabagone se mani vakacava sara na dredre ni nomui tekitekivu, toso tikoga ena vakabauta ko na rawata vakaidina na nomu tatadra.