I SEVU NI METALI NEI AHMADIYYA NI OTI E 25 NA YABAKI NI KENA TAUYAVU.

E toqai nikua ena vola i tukutuku ni veigauna na nona mai rawata e dua nai sevu ni nona metali na koronivuli na Ahmadiyya Muslim College mai Dreketi e Macuata ni oti e 25 na yabaki ena kena a mai  tauyavutaki.

Nai sevu ni metali oqo e mai rawata o Dilewa Nirabe,na gone yalewa ni Vuniqalutu ena tikina o Dreketi ena yasana vakaturaga o Macuata,ka mai rawata kina na metali Siliva ena veitau cici ni 1500  na mita, ena junior girls.

E vakaraitaka o Qasenivuli Sevanaia Yacalevu,ka veikau tiko mai vei ira na gonevuli, ni ra lewe 14 taucoko  na mai vakaitavi ena Cocacola Games ni yabaki oqo,ka levu sara na dredre era sotava mai ena nodra vakavakarau tiko,ka veibolei sara vakalevu vei ira na gone,ni sega nai yaya ni tereni ka vakavinavinakataki na nodra yalo bolebole nai tubutubu ena ena nodra veitokoni vakai lavo.

Ia,ni sa mai rawati sara e dua na metali ena siga nikua,sa dua na ka na kena marautaki,vakabibi ni kena i sevu ni metali me bau rawati enai volavola i tukutuku ni Coke Games vei iratou.

Na koronivuli oqo na Ahmadiyya Muslim College,era vuli tiko kina na gone mai na tikina o Dreketi mai Macuata ,ka 80 na pasede ni gonevuli era gone i Taukei,ka 20 ga na pasede o ira na noda vasu.

E na vakaitavi tale tiko na gone yalewa oqo o Dilewa Nirabe ena veitaucici ni 3000 na mita, ena i vakatagedegede ni open grade ena siga ni mataka.

VITIFM 92.2FM/92FM/92.6FM/92.4FM – E KAMICA QAI KACHI!!!

I VUREVURE – MR. SEVANAIA  MATEVAKALOLOMA YACALEVU.