LESU KI VULI NIKUA E RAUTA NI 22,000 NA GONEVULI YEAR 12 KEI NA 13.
Written by Maikeli Radua on November 1, 2021
Picture credit: Fijivillage
Era sa lesu ki vuli nikua e rauta ni sivia e 22,000 na gonevuli Year 12 kei na 13 ni oti e 6 veimama na vula ni nodra tu ga e vale ena vuku ni mate na Covid 19.
Sa veivakauqeti na Minisita ni Vuli o Premila Kumar kivei ira na gonevuli mera veitaratara yani kina Minisitiri ni Vuli kevaka era sotava tiko eso na dredre me rawa ni ratou vakarautaka mai eso na Counselors, Qasenivuli kei na so na Qasenivuli liu era rawa ni veivuke vei ira.
Vakaraitaka talega na marama Minisita mera na qarava tiko eso na vakadidike na veikoronivuli me rawa ni ra na raica kina eso na dredre era na lako curuma tiko na gonevuli ena veisiga…me vaka taka na sega ni kedra i vakasigalevu, sega na bag ni vuli, kei na daramaki ni uniform makawa.
Ena tomana tikoga na matanitu ena nodra vukei na gonevuli ena kena voli na nodra Text Books,Tuition Fees kei na nodra i vodovodo ni basi ka ratou na raica talega se gaunisala cava tale eso rawa ni ratou veivuke kina Minisitiri ni Vuli.
E vakaraitaka talega na marama Minisita ni Vuli ni namaki me rawa ni ra lesu ki vuli na gonevuli mai na Year 1 kina Year 11 ke sega ena 29 ni siga ni vula qo Noveba era rawa ni ra lesu ki vuli ena i ka 4 ni Janueri 2022.
Kena i tukutuku matata o na rogoca duadua ga ena Vitifm 92.2FM/92.0FM/92.6FM
