‘MARAUTAKI NA VEIQARAVI MAI OSITERELIA’-JOELI SAQANIVALU

E vakaraitaka o Joeli Saqanivalu e dua na noda cauravou i taukei ka gole vakacakacaka e na ruku ni porakaramu ni NEC,ni marautaka sara vakalevu na nona sa laki veiqaravi tu mai Ositerelia,me vaka ni sa bau laki rawati tu kina eso na ka,me bula kina na nona vuvale yani e Viti.

Na cauravou oqo,e cauravou duadua ga ni Viti,ka cakacaka tiko ena kabani na ‘PLANT GROW PICK,ka  sub contract o ratou  vei ira na farm lelevu mai Eufton,New South Wales,e Ositerelia,ena kena qaravi na cakacaka ena nodra farm.

E cakacaka vakadraiva na cauravou oqo,ka dau vakayagataka na veimisini lelevu ena gauna ni Tatamusuki,ka ra dau tamusuka kina na vei vuanikau me vaka na Moli,Almond kei na vuqa tale,ka tukuna ni se qai oti sara ga nikua na kena tamusuki tiko na Almond,ka 4 taucoko na vula na balavu ni kena  tamusuki tiko mai.

Na ‘ALMOND’,e dua na mataqali vua ni kau ka dau vakayagataki e na peanut butter,sucu,i lumu ni yago,waiwaini kakana ka sau levu sara o koya.

E vakaraitaka talega ni sotavi e so na dredre me vaka ni so na gauna e dau cakacaka me 12 na auwa mai na 6 ena mataka,ka suka sara mai ena 6 na kaloko ena yakavi,ka sega kina na gauna ni nona veitaratara lesu mai kina vei ratou na weka ni vuvale yani e Viti,kei na batabata ni draki mai kea sa bau dau taratara sui saraga.

Nai vakasala ga e gadreva me vakadewataka vei keda ka se da sasaga tiko ena vuku ni cakacaka en valagi,sa i koya me kaukauwa na noda vakatulewa ena vuku ni veitemaki ena vuravura levu o ya,kei na vosota ena gauna ni cakacaka me rawa ni rawati kina nai naki dina noda laki cakacaka.

VITIFM 92.2FM/92FM/92.6FM – E KAMICA QAI KACHI !!!!

I VUREVURE KEI NA I TABA – JOELI SAQANIVALU.