Meda rokova na lawa ni gaunisala – Draiva kei na lewenivanua
Written by Atu Kurumudu on December 15, 2023
Mai vulagi tiko ena Vakariba Malamala ko Waisake Vasukinatavea ka vakabibitaka tiko na noda vakamuria na lawa ni gaunisala na lewenivanua. E bibi na nodra itavi na draiva ka bibi talega na ka e dodonu meda vakamuria na lewenivanua.
Me yacova tiko mai ena gauna oqo , era lewe 33 na lewenivanua era sa mai leqa ena vuku ni vakacalaka ena noda vei gaunisala. Laurai ni vakavuna tiko vakalevu na leqa , na vakau lori vakatotolo se ‘speeding’. 
Dua talega na ka ka vakavuna tiko vakalevu na vakacalaka ena veigaunisala sai koya na vakau lori ena dela ni mateni. Ratou lewe 4 na lewenivanua e ratu mai leqa ena vuku saraga ni vakau lori ena dela ni mateni. Sa kerekere gona kina o Waisake ki vei kemuni kece na draiva moni qaqarauni ena gauna ni mamarau eda sa lako curuma tiko oqo.
Ena dua talega na vakadidike ratou vakayacora tiko e laurai ni levu na vakacalaka e yaco tiko ena bogi mai na 7pm kina 8pm.
Laurai ni yaco tiko vakalevu na vakacalaka mai na yasayasa vaka Ra me vaka e tabaki toka oqo.
Kuria ko Vasukinatavea ka kaya . vei kemuni na draiva , ni vakacegu vakavinaka ke balavu na vanua koni na ciciva ka cegu vaka lailai ena tolo ni gaunisala ni bera niko ni toso tale. Kua niko wele ka tabu niko vosa tiko ena nomu talevoni. Raica me taucoko tu nai vakatagedegede ni nomu lori ni bera niko toso kina vanua ko lako kina.
Meda marautaka na siganisucu oqo , tovolea meda vakamuria ka rokova na lawa ni gaunisala.
source:Waisake Vasukinatavea [LTA]
