NOMU GAUNA – WAIKATAKATA VURE E DELAI NUKUVULA.
Written by Mika Qalobula on November 26, 2021
”NOMU GAUNA”- Na nodratou sere na WAIKATAKATA VURE E DELAI NUKUVULA,ena veiliutaki maqosa nei Maciu Salauca ka vakaitikotiko tudei mai Amerika,ka levu sara era taleitaka ena vakaciriloloma ni qaqana kei na kenai vakatagi.
E talanoataki ena sere oqo edua na vuvale vinaka,ka bucini ena loloma dina me vaka ni susugi cake kina e 4 nai solisoli mata vinaka.Ni oti e 9 na yabaki ni kena sokotaki na waqa ni vuvale oqo,sa biu e dua nai tuvatuva me sa biu vanua o vuni marama,me gole yani ki valagi ena vuku ni cakacaka,ka me rawa kina ni veivuke mai vei ratou na veitamani.
E totoka tu na veitaratara ena mona livaliva ena veisiga me vaka ni ratou se qai veibiu toka ga vakalekaleleka.Ia,ni sa balavu vakalailai na tu veiyawaki,sa veiyawaki talega na veiqiriti,kei na veitaratara,ka vaka me ratou sa guilecavi na vei tamani,me vaka ni sa laki tao o tinadratou ki vua e dua tale na tagane.
Sa qai nodratou qaqani masu tu na veitamani me na yaco na gauna me na lesuvi ratou tale mai o Nana, me ratou rawa ni vakacegu ka me na mai tarai cake tale nodratou vuvale lomani,ia kani seva ni sa sega.
E qai biu me qaqani sere oqo na vosavosa vakaviti – AU TAGITAGICA NA YALOKA NI MATA NI VONU-ka vakabalebaletaki ki vua e dua e solia na nona i gu se kaukauwa me rawata e dua na ka,ia e qai sega ni rawata vakadua,ka rawa ni cavuti vua na turaga oqo,ni nona saga ena nona i gu taucoko kei na nona kaukauwa me rawati watina lesu tale mai,ia,sa bau dredre dina sara ga.
Vakarorogo mai ena VITIFM 92.2FM 92FM kei na 92.6FM.
