RATOU VUETI BULA E 3 NA LEWENIVANUA E VITI NI OTI NODRATOU CIRI KOTO E WASAWASA ENA LOMA NI 9 NA SIGA.
Written by Maikeli Radua on October 13, 2023
Image: Supplied
Eratou a vuetaki bula mai na wasawasa e Ysawa-i-Rara rauta ni 277.8 na kilometer ena Vua-i-Ra kei Yasawa e 3 na lewenivanua e Viti ni oti nodratou a ciri voli ena loma ni 9 na siga ena loma ni nodratou waqa ni qoli kau kena levu e 8.5 na meter.
Vakaraitaka na Republic of Fiji Navy ni a veivuke ena veivueti oqo na Rescue Coordination Center New Zealand, New Zealand Airforce, Pacific Climage Change Center kei na waqa ni qoli na Lu Rong Yu 328, Rescue Coordination Center Fiji, RFNS Kikau ka ratou timi vata ena nodratou vueti bula mai na lewe 3 na lewenivanua qo.
Ratou a laurai na lewe 3 na dauqoli qo mai vei ratou na Royal New Zealand Air Force P- 8A Poseidon Crew ena sigalevu ni siga Vukelulu.
Tukuni ena dua na i tukutuku ni ratou a vodo tiko na lewe 3 qo ena dua na waqa ni qoli na yacana na “LEWA” ka ratou a biuti Lautoka mai ena nodratou i lakolako ni siwa ki NANUYA ISLAND i na Yatu Yasawa Balabalavu me rauta ni 2 na macawa ka qai laki leqa na i idini ni nodratou waqa ka lai vakavuna nodratou ciri voli e wasawasa.
Ratou tukuna na lewe 3 qo ni ratou kauta tiko eso na LIfe Jackets kei na flares, ka sega vei ratou na locator beacon kei na misini me ratou veitaratara lesu mai kina ki vanua ni ratou sa sotava tiko na leqa, ka dua ga na mobile phone e tiko vei ratou ka sa maca tu na kena batiri.
Sa vakavinavinakataka na Fiji Navy na veitokoni mai na RCC New Zealand and NZDF kei na itaukei ni waqa na Lu Rong YU 328 ka ratou a vakaitavi sara vakavinaka ena nodratou vaqarai na lewe 3 na dauqoli qo.
Kena i tukutuku matata vakarorogo tikoga mai ena Vitifm 92.2FM/92.6FM/92.0FM/92.4FM
