SERE VOU – CAVA LEVU NOQU CALA – LEBA BOI YAWA E LOMAI NASAU.

‘LEBA BOI YAWA E LOMAI NASAU’ – Na matasere oqo e sega ni ka vou ki vei keda me vaka ni ratou sa rogo levu tu ena noda Viti,ena buturara ni veivakamarautaki.

E liuitaka tiko na matasere qo, ka buli sere tale tiko ga kina o Etonia Lote jnr,na cauravou ni Nasau,Koro mai Lomaiviti,ka ratou lagasere tiko kina o Ilaisa Ravula,Mesake Tuberi,Anare Vute kei Pita Ralaca.

 ‘CAVA LEVU NOQU CALA’ –

Oqo nai talanoa baleta e dua na cauravou bucina na nona vuvale ena marau kei na loloma dina,ka sa rau basika nai solisoli ena loma ni nodrau vuvale mamarau oqo.

Sa yaco na gauna sa tekivu me vakila ni sa luluqa tiko yani na loloma me vaka na kena e a  vakila  ena I matai ni gauna.

E dabe sobu na cauravou oqo ena dua na siga  ka vakamasuti na watina ,ke rawa ni rau vaka vinakataka na nodrau vuvale me kakua ni dua na ka e yaco me vaka ni rau sa tiko nai solisoli.

E sega ni kila ko cauravou ni sa tiko na bucibucini vei na watina, me sa drotaka na luvedrau ka biuti koya ena Liga ni lawa.

Ni ratou a veitalatala vakavinaka ena dua na mataka  me laki cakacaka o nodratou Ta, ka kidacala o tagane ni se tiko ga mai vale ni cakacaka, sa yaco yani na kena samani mai vei ratou na ovisa, ka qai yaco mai vale sa lala na loma ni vale,me vaka ni sa  lako o na watina,ka sa kauti rau na luvena ka qai biuti koya tu mai vaka lawa.

Oqori saraga na vuna e a qai cavuta kina na vosa oqo ‘Cava levu noqu cala au cakava’??.me vaka ni vakila nia solia tu na nona dina kei na nona vinaka taucoko ena nona veiqaravi,ka qai biuti koya ena lawa o na watina ka mai vakavuna na nona rarawa.

E vica nai vosavosa vakaviti ena vakayagataki tiko ena sere oqo,ka sa biu toka oqori kei na kedratou i balebale :

1. DAMUDAMU VAKA SENITOA

Rairai vinaka ka Sega ni vinaka na nona I vakarau se I tovo.

2. MAROROI SUCU KO RA VUSI

Sega ni vakabauti se nuitaki

3. TABU ROGOCA NA KERE I CAKAU

Sega ni rogoca nai vakasala

4. COLO ENA QAI YATI

Ena yaco ga mai nai tinitini ni ka kecega