SERE VOU – DODOMO DARU BUCINA – MUDRE NI CAGI KEI SOVAIWAI
Written by Mika Qalobula on September 15, 2022
‘MUDRE NI CAGI KEI SOVAIWAI – Oqo na matasere ka liutaka tiko o David Seru, na cauravou ni Vunisei,Naceva mai Kadavu ka vasu ki Naigani,Verata mai na Tailevu ni Siga.E vakatoka yaca na nona matasere kina mataqali ka vasu kina mai Naigani me vaka nia susugi cake ga mai kea.
‘DODOMO DARU BUCINA’-Na sere oqo, e i matai ni sere ena nodratou i matai ni katokatoni ka talanoataki kina na bula ni veidomoni ka rau lako curuma e dua na veitau,ka a bucini veidomoni qo ena 2002,ni rau a se vuli vata voli ena FIT e Samabula.
Ni oti e 6 na vula na nodrau veitau voli mai,sa qai nanuma o cauravou me sa laki Tabailagotaki gone yalewa, ka raica ni marautaki sara vakalevu na veika e a laki vakayacora yani.
Ia,ni toso tiko na bula ni veitau,e sega vakadua ni kila o cauravou na veicavilaki levu e cakava tiko vua na goneyalewa oqo,me yacova saraga na gauna me qai tukutuku kina o gone yalewa, ka sa mani kavoro na bula ni veitau oya.
Sa vakanadaku o goneyalewa ka sa laki vakawati kei nona lasa vuni ka laki dua sara kina na luvena,ia ko cauravou, e sa mani qai mai vakawati talega,ka 4 na nona i solisoli.
Na nodrau dui vakawati oqo,e rau qai dui lasa ruarua na dui watidrau,ka rau mai lako curuma ruarua tu kina na dredre ni bula, ena vanua duidui rau vakaitikotiko kina.Sa qai vaqaqara mai o yalewa me vakasaqarai tagane ena yabaki oqo, me yacova ni sa kila na nona fb account ka ma ni qai vakauta vua e dua na friend request.
E kidacala o cauravou ni sa oti e 20 na yabaki,qai raica ni sa add friend tu yani na gone yalewa ka a laki Tabailagotaka ena 2002.Sa rau mani qai veitalanoa ka veiwaseitaka na veika rau dui lako curuma,ka rau vakadinadinataka ni rau sa mai waqa vata sara tu ga.
E rau sa qai mai biuta vata e dua na tiki ni siga me rau sota kina oya nai ka 25 ni Maji ena yabaki oqo,me na qai gade sobu yani o gone yalewa vei cauravou e na Mua I Ra,me vaka ni tiko voli mai Nadi o cauravou.
Ia,ena tiki ni siga vata sara ga qori ni vakarau me vodo yani o gone yalewa e Suva me gole sobu ki Nadi,e rau qai sota vakasauri kei na watina,ka mani kauti koya tale ko tagane oya ka mai tini boto i levu tu yani na nanamaki ni veisotari.
E rawa talega mo na rogoca na sere oqo ena VITIFM 92.2FM,92FM kei na 92.6FM.
VITIFM- E KAMICA QAI KACHI!!!!!!
Source – David Seru.
