SERE VOU-KO YAMECI AU DAULOMANI-K3
Written by admin on July 13, 2022
MATASERE- “K3”-Na matasere oqo e cavutu mai na loma ni koro vakaturaga o Nananu,Vatukaloko mai Ra.Na “K3” e kau mai ena delani ulunivanua ka tiko ena ruku ni nodratou koro makawa ka yaca ni delana oya na Korotolu Mountain.Na matasere na “K3″e kenai liuliu tiko o Que Lomavatu,ka vuqa sara na nodratou sere sa dau rogoci,ka taleitaki sara tiko ena kena dau vakatagataki tiko ena VITIFM.
“KO YAMECI AU DAULOMANI”-Na sere oqo e kena sere edua na marama ni Nadroga kei na dua na turaga ni Kadavu,ka bucini na nodrau veidomoni ena nona dau matemateci turaga ni Kadavu tiko na marama ni Nadroga oqo.
Ena maqosa ni nonai vukivuki kei na nonai vosavosa na marama ni Nadroga oqo,e saga ena nonai gu taucoko me yameci koya na nona turaga tau mai Kadavu,ka mani yaco me vaka kina.
Sa taucoko sara na sokotaki ni vuvale vinaka oqo,ka yaco na gauna me sa sucu kina na nodrau ulumatua cauravou,ka rau marautaka sara vakalevu,ka sega ni dede,sa sucu tale na i karua ni luvedrau ka tagane talega.Ia,ni oti e 3 na vula e vuravura nai karua ni luvedrau,sa tekivu me sa duatani nai vakarau nei marama,ka sa vakila na turaga ni Kadavu qo,ni sa sega ni malele tiko mai kina nodrau bula ni vakawati ko tinadrau na gone.
Ena vula ka tarava ga,ka vula 4 kina na i karua ni luvedrau, sa biubiu talega kina na marama ni Nadroga oqo,ka sa qai rogovaki mai ni sa dro taki sara kina i dromudromu ni siga ki vua na tagane ka rau a se veivosaki tu mai ena gauna ni nona vuli.
Na sere oqo e buli ka talanoa tiko kina na turaga ni Kadavu oqo se cava sara mada e tekivuna kina na veidomoni oqo ni sega ni rawa ni rau tinia vata,ka koto ena Chrs ni sere qo-
“OSOBO CAVA GA KO TEKIVUNA KINA,NI RUI DREDRE VEI IKO MO NA LAKI TINIA”.
Sa qai qaravi rau tu na gone na Turaga ni Kadavu qo me yacova tu mai qo.
Vakarorogo mai ena VITIFM 92.2FM,92.6FM kei na 92FM.
VITIFM-E KAMICA QAI KACHII.
