SERE VOU – LOLOMA WALEGA – VOQA NI DELAI DOKIDOKI
Written by Mika Qalobula on December 19, 2022
‘VOQA NI DELAI DOKIDOKI’ – Na matasere oqo e sega ni ka vou vei keda me vaka ni ratou kilai levu ena noda Viti,ena butu rara ni veivakamarautaki,me vaka ni liutaka tiko o Temo Soko Lote.
E ratou cavutu mai na matasere oqo mai na loma ni koro vakaturaga o Nasau,Koro mai na yatu Lomaiviti,ka dau taleitaki sara vakalevu na veisere eso eratou dau bulia ka lagata.
‘LOLOMA WALEGA’-Oqo e dua na nodratou sere vou ka katoni ena yabaki oqo,ka talanoataki kina e dua na draki ni bula e lako curuma e dua na cauravou ka vakaitikotiko mai Valagi.
E levu na nona tatadra kei na nona sasaga na cauravou oqo,ka yaco na gauna me vakila ni sa tao kece na nona sasaga me vaka ni sega ni dua e tu e yasana me vukei koya.
Sa yaco na gauna me sa vuki na cauravou oqo me lesu tale vua nai taukei ni bula ka yaco ena dua na bogi levu me dabe ka masu,ka sega ni kila na drodro vakayauyau ni wai ni matana ka vakila ni sa dua na rarama e sa cilavi koya mai.
Ni oti na nona masu o ya e vakila ni sa dua nai colacola levu e vaka e sa taluva tani mai vua,ka yaco sara na gauna me rau sota kina kei na dua na gone yalewa,ka sotavi kina na nona gagadre kece sara ka mani qai vakavotukana kina na nona tatadra na cauravou oqo,me vaka ni ra sa tatadoladola ga mai vei mata ni katuba kece ka ra tasogo tu.
Sa qai yalataka o koya me dau wasea na nona i yau ka vakaiyautaki koya ena loloma,ka sa dau cakava sara tu ga,vakabibi vei ira na wekada e ra dau lako yani,ka dau veivuke sara vei ira ka kena usutu levu duadua na nona masu mai na vu ni yalona,me vaka ni sa vakadinadinataka o koya na cakacakamana e yaco ki vua.
E rogoci talega e na sere oqo,na voqa ni domo i Jesoni Tukana,nai liuliu ni matasere na ‘SENILAGAKALI KEI KOROILAGI’
VITIFM 92.2FM/92FM/92.6FM.
VITIFM – E KAMICA QAI KACHIIII!!
Source – Temo Soko Lote.
