SERE VOU – SENI VUGA DAMU NI NAVATUSILA – SA I VEI NA LOLOMA KOYA.
Written by Mika Qalobula on May 17, 2022
SENI VUGA DAMU NI NAVATUSILA – E ratou cavutu mai na loma ni koro vakaturaga o Nanuku,Navatusila,Nadroga/Navosa,ka liutaka tiko na matasere oqo o Mr Ratu Sela Wakanivuga,ka da rogoca tiko ena nodratou sere vou oqo na voqa ni domo i Pio Tora, Mitieli Vaidula kei Rt Meli Tuinakauvadra.
Sa mai tavoci ena bogi nikua ena porokaramu na ‘NEW BORN’,na nodratou sere vou,ka yaca ni sere na -‘SA I VEI NA LOLOMA KOYA’.
Na sere qo e baleta ga na dredre a sotava na iliuliu ni matasere ena vuku ni dua na tauvimate ka a sega ni namaka ka tarai koya ena yabaki 2017. E a cakacaka vakaqasenivuli ena gauna ka yacovi koya kina na mate oqo,ka vesuka kina na yavana ruarua ka vakavuna me sega ni tucake se taubale rawa kina, ka sa mai vakaleqa talega kina nona cakacaka.
Ni oti e 2 na yabaki (2019), sa tekivu lesu vakamalua tale mai na bula ka bau via vinaka toka mai.ia, sa mai veiqaravi voliga e vale me vaka ni rau se lailai talega na gone. Ena yabaki 2020,sa vaka me bibi tale kina na mate vata tikoga ya,ka sa tekivu lomaleqataka na watina na bula ni matavuvale e veisiga me vaka ni ratou vakaitikotiko e taoni ka sa kena ikuri nai vau ni tauvimate sa yacovi qasenivuli tiko.
Sa qai vakasamataki nai wali ni leqa ka sa nanumi me rau sa vakau na gone vei nodrau Bu, ka sa tukuni vei tauvimate(qasenivuli),me lako vei iratou na nona matavuvale ka me ratou sa laki qaravi koya.
Sa qai mai tiko taudua voli o watina ka sa mai malele ena lasa kei na marau vakavuravura kei ira na nona itokani. E rau dau veiqiriti tu ga kei qasenivuli ( na watina),yacova na nona sa vakaraitaka mai ni sa sega ni qai vinakati koya tale me vaka ni sa na sega ni dua na bula me na qai kunea se raica ale vei qasenivuli,ka sa na rawati koya ga ko mate.
Sa mai vakaraitaki talega vei watina me vagalalataka na ka kece e kila ni nona mai na vale ya,ka sa mani ciqoma o Mr na ka kece oya me kua ni ikuri ni dredre sa tiko rawa ka ma ni yaco ikea na veitawasei ni matavuvale ka a taucoko tu mai na kena tauyavutaki. Ena dela ni mosi kei na dredre oya, vola kina o Mr na sere qo ena nona idavodavo ni tauvimate ni vakataroga isa SA EVEI NA LOLOMA TALEI KOYA ka tauyavutaki kina nodrau vuvale,ka mai tauyavutaki talega kina na matasere qo na Senivuga Damu ni Navatusila.
Me votai vakabibi vei Ms Verenaisi Talai Nainima (watina) ena Ba Provincial Freebird Institute e Lautoka kei ira kece sara na veimatavuvale veiwatini se veitau era sotava tiko na veiulunivanua eso. Me nodra na uto ni tukutuku e tiko ena sere qo: draki vinaka se draki ca, na loloma me dua tuga.
Katoni vei : Wise Rogoyawa e Lautoka
( Stoney Tune Records)
Intro ni sere: Qori na voqa ni domoi Saliceni Raiwalui mai na matasere na Buca Drokadroka.
E rawa mo rogoca na sere oqo ena VITIFM 92.2FM,92FM kei na 92.6FM.
VITIFM – E KAMICA QAI KACHI!!!!!
