SERE VOU – SISI NI LAKEBA – MATANIBOLA

‘MATANIBOLA’-Na matasere oqo e liutaka tiko o Sai Navoty, ka ratou vakaitikotiko voli mai na yasayasa vaka- Ra me vaka ni vuqa vei ratou e veiqaravi voli ena otela ni saravanua.

‘SISI NI LAKEBA’-Oqo na sere ka talanoataki kina na nodrau veimusumusuki e dua na cauravou ni Yasawa, kei na dua na goneyalewa ni Lakeba mai na Yatu Lau.Na Cauravou ni Yasawa oqo e sa bau wavokita vinaka na noda vuravura,ka vakabutuka vakavinaka na kena soso,sarava na kena vei senikau kei na kenai boi, ka sega vakadua ni bau malele vakalailai na yalona ena veika e sarava ka raica ena nona gauna ni gade.

E  cakacaka tokaga ena dua na otela ena yasayasa vaka Ra o cauravou,ka yaco na gauna me laki veiqaravi talega yani na gone yalewa ni Lakeba qori ena Otela vataga oqori.

Sa mani qai bucini e kea na veikilai ka mani laki yaco sara me titobu,ka rau laki veidomoni,ka sikalutu kina o cauravou ena totoka walega ni kenai rairai na gone yalewa ni Lakeba oqo.

Na nona veilakoyaki voli o cauravou,a qai mai coriti saraga ena gauna e sa taubena kina na salusalu ‘SISI NI LAKEBA’,ka sa vakadeitaka e lomana,ni sai koya oqo e sa vakarautaki tu mai lagi me nona.

E yaco na gauna me dewa cakacaka kina o cauravou,ka vakavuna me rau sa tu veiyawaki,ia e sega vakadua ni vakamalumalutaka na nona domona na nona ‘SISI NI LAKEBA’.