SERE VOU-TITI NOQU KA TALEI-VOQA KEI LEWAYASI
Written by admin on January 25, 2023
VOQA KEI LEWAYASI-Na matasere oqo e cavu sara tu mai ena loma ni koro vakaturaga i Sese mai Saqani ena yasana vaka turaga ko Cakaudrove.
TITI NOQU KA TALEI-Oqo na sere me baleta na nodrau veiotalanoa edua na turaga ni Saumakia Naitasiri o Vilive Rinikama keina na dua na goneyalewa ni Navatuyaba Rewa o Titi na yacana.
O tagane e vakaitikotiko tudei mai na vanua levu ko Igiladi ka rau qai veikilai kei na goneyalewa ni Rewa oqo.Rau veitalanoa ka sa bucini vinaka sara nodrau veidomoni ena veisiga.Ia,e rau tu veiyawaki tu ka sa dua na ka na nona dau nanumi Titi vakalevu na turaga ni Saumakia oqo ena veisiga.
Toso vinaka tu na nodrau veitalanoa qai dua na siga rauq ai qai veicudruvi, ka mani vakavuna kina me rau veibiu kina vakalekaleka na veotokani e rua oqo,ka cavuka talega kina vakalekaleka na nodau veitalanoa.
Ena dua na siga qai kidacala o tagane ni sa tukuni mai vua ni sa laki duguci tale o goneyalewa oqo mai vua e dua tale na tagane.Sa dua na ka na mosi ni yalona kei na nona vakasamataka lesu na gauna erau dau veitalanoa tu kina kei na goneyalewa ni Rewa oqo.Ia,e sega vakadua ni yalolailai se vakasuka,ka dei tu ga na yalona ni sa kila tu ni sa i koya dina ga na nona sui ni saresare.
Nai talanoa oqo sa qai nanumi me biu edua na kena i tukutuku ka toqai me buli edua na kena sere ka mani vakatokayacataki na sere oqo-TITI NOQU KA TALEI.
E rau mani qai veilesuvi tale na veitokani e rua oqo ka sa rau nanuma me rau tomana tale na nodrau veidomoni.
Sa qai vakadeitaka na nona mala ni vosa na turaga ni Saumakia oqo ki vua na goneyalewa ni Navatuyaba mai Rewa me rogoca ka kila ni sai koya ga na nona ka talei.
TITI NOQU KA TALEI.
VITI FM 92.2FM/92.6FM/92FM.
VITIFM- E KAMICA QAI KACHII.
