VAKAVAKARAU MAI LEVUKA NA TIMI NI RAKAVI 7 ENA SOTASOTA KI DUBAI ENA VULA MAI QO.
Written by Maria Solomone on November 17, 2022
Timi ni Viti leyavitu,e Levuka,Ovalau-pc:Fiji Rugby
Ratou vakaukauwa yago vata tiko na timi ni Viti leyavitu mai na koroturaga makawa,mai Levuka ena vuku ni vakavakarau ki na sotasota mai Dubai kei na kena mai Cape Town ena vula mai qo.
Eratou biubiu ena noa na timi ki Levuka,ka lai vica sara nodratou cici vata kei na veisiko ena vei tikotiko kei na so na koronivuli mai kea.
Kaya o Ben Golling na dau ni veivakatavulici ni ratou tovolea mada e dua na kena i lakolako vou ka ratou biuta vata qo,ena nodratou sa kauta sara ga yani na vei tikotiko ena noda vanua na vakavakarau ni timi ni da vakanamata ki na sotasota ni Vuravura ena 2022/2023.
Kaya tale ni marautaki sara e Levuka,ena kena vukei sara tale ga na veiwekani kei ira na lewe ni vanua,ka vakabibi ena dua tale na vanua vou era vakaukauwa yago kina na cauravou.
E va na siga na nodratou na vakavakarau tiko mai Levuka,ka namaki me sa na kacivaka na yacadratou na cauravou ena mua ni macawa qo ki na sotasota ni Dubai kei na Cape Town 7s.
Namaki me na levu vei ratou na lewe ni timi digitaki,eratou sa qito oti mai ena Hong Kong 7s,ka dina ga ni na so toka na veisau ena vuku tale ga ni mavoa.
Sa na cava tiko na nodratou vakaukauwa yago mai Levuka ni mataka.
Viti e tobu vata tiko kei Argentina, New Zealand kei Uruguay ena Dubai 7s ka na tekivu taki ena i ka 2 ni siga ni vula mai qo.
Ena sota kei Uruguay ena i matai ni sota vakatobu 8.12pm ena Vakaraubuka na i ka 2 ni siga,tarava kei Niusiladi ena 11.11pm, ka kenai i otioti ena 5.05am,mataka ni Vakarauwai.
Ivurevure:fijirugby
