WILIWILI LEVU NI QASENIVULI ERA TAO TU QO E VITILEVU…Ena rawa ni na qai vakavuna me tekivu na vuli ena i ka 4 ni Janueri 2022 – Kumar.

Image: Supplied

Eratou a bose ena siga Moniti na Minisita ni Vuli o Premila Kumar,Minisita ni Bula Dr. Ifereimi Waqainabete kei na Permanent Secretary for Health Dr James Fong me baleta na tikinisiga ni kena dolavi na vuli ka namaki me sa na rawa ni tekivu na vuli ena i ka 4 ni siga ni vula o Janueri.

E baleta oqo ni na vakatau tiko na tekivu ni vuli ena kedra i wiliwili na gone era sa  taura na i cula ni Covid 19 Vaccine.

Ena nona vosa tiko mai na koronivuli na Votualevu College e vakaraitaka kina na marama Minisita ni dua na i wiliwili levu ni qasenivuli era se tao tu ga qo e Viti Levu ka ra veiqaravi tiko mai Vanualevu kei na noda Veiyatu Yanuyanu.

Sa sasaga tale tikoga na tabacakacaka ni vuli ena kena sagai mera vakasukai lesu tale na qasenivuli me vaka ni sa vakarau vakasukai lesu tale na nodra veiqaravi na veiwaqa kina noda veiyatu yanuyanu.

Sa kerea talega na Minisita ni Vuli o Premila Kumar vei ira na qasenivuli me vakatabakidua na nodra veiqaravi vei ira na gone ena gauna era sa na lesu yani kina ki vuli.

Tukuna talega na marama Minisita ni a vakaleqai sara vakalevu na nodra i vakarau ni bula na gone ena gauna bolebole eda donuya tiko qo ka mera na namaka na qasenivuli ni na levu sara na ka ena veisau tiko vei ira na gonevuli.

Kena i tukutuku matata o na rogoca tiko ena Vitifm 92.2FM/92.6FM/92.0FM