VEIVUKE E VICA NA DAUQITO ENA AUCKLAND BLUES VEI IRA NA VAKALEQAI MAI NZ
Written by Maria Solomone on January 31, 2023
pc:newshub
Era marautaka tiko na dauqito ena kalavo ni qito rakavi na Auckland Blues Super Rugby na kena marautakitiko na “Auckland Anniversary Day” ena nodra veivuke ena taoni o Okaladi ena ualuvu koya vakacacana e vuqa na vanua mai na siga Vakaraubuka.
Oka kina o Beauden Barrett kei na prop Ofa Tu’ungafasi kei ira na vica tale na dauqito ena kena vakarautaki na kakana, isulu, wainimate kei na veiyaya tale eso vei ira na lewenivanua era gadreva na veivuke.
Tukuna o Barret ni vuqa na lewenivanua e sega na vanua mera tiko kina ena gauna oqo, ka dua na ka marautaki vua me veivuke vei ira era vakaleqai.
E lai veivuke tale ga na dau veivacu e Niusiladi o David Tua ena kena vakarautaki na wainimate ka vakauti na veivuke eso oqo ena veivanua e Okaladi era gadrevi kina.
Vakaraitaka na Council mai Okaladi kevaka me na tomani tikoga na tau ni uca ena namaki me na toso cake tale na ualuvu kei na sisi ni qele.
Ivurevure:fijivillage
