”E KA BIBI NA VOSOTA KA NA QAI VAKAVOTUKANA NA NOMU SASAGA”-KURULALA

Written by Mika Qalobula on June 21, 2023

E ratou na biubiu ena noda vanua e lewe 20 na cauravou ena i ka 20 ni siga ni Jiune ni yabaki sa oti,enai lakolako vakacakacaka ena ruku ni prokaramu ka vakarautaka na ‘National Employment Center kei na ‘Plant Grow Pick,ka ra laki veiqaravi ena ‘CEDAR MEATS’,mai Malevani ena vanua levu o Ositerelia.

Nai lakolako oqo e lewena talega edua na cauravou ni Raviravi Kubulau mai Bua,ka vasu ena koro vakaturaga mai Navunisole Namalata mai na Vualiku kei Tailevu,o Leone Kurulala,ka ratou laki veitomani kei ira e ra sa ,liu ka ra lewe 150 taucoko.

E vakaraitaka o Kurulala ni ka bibi na vosota me rawa kina ni vakavotukana kina na nomu sasaga,ka me kua ni guilecavi na kena tataunaki tiko na bula vua na kena i taukei.

Sa vakacagau na veiqaravi ka levu sara na vei dredre e ra dau sotava,ka dua na dredre levu sai koya oya na nodra tu veiyawaki kei ira na lewe ni nodra vuvale,vakabibi o ira na nodra veitinani,ka dau vovotu tuga na matadra na gone ena veigauna taucoko.

Na batabata talega e laki sotavi i kea sa dau vosoti tuga me rawa ni vakavotukana na sasaga, me vaka nia laki veiqaravi tu me vula 4 ena kena dau drudrugi,ka vakasavasavataki na Sipi,na Me,kei na luve ni Bulumakau.

Ni oti e 4 na vula ni cakacaka mai kea,sa qai dewa o Kurulala ena cakacaka vaka Maitenanace and Repair,oqo ena nona vale na Turaga ni Lepanoni ‘VAKA VATU’,ka taukena na kabani ka ratou cakacaka tiko kina,ni bera ni kacivi me laki veitomani kei na timi ni Maintenance Department ni kabani,me yacova tiko mai nikua.

E levu sara na ka era laki vulica vakabibi na vakayagataki ni gauna,na bula vaka i vakarau,kei na kena vakaukauwataki tiko na bula vakayalo,ka vakausivi ena vuku ni nodra cakacaka veicurumaki tiko kei ira mai na 8,kina 10 na mata tamata mai na vei yasai vuravura.