RAWATA O RATU NA NONA I VAVA NI QITO MAI NA ‘KUSIMA PACK’
Written by Maria Solomone on June 21, 2023
o Ratu e vuli tiko ena koronivuli Jeremaiah College
O Ratu e dua na cauravou ka vuli tiko ena koronivuli na Jeremaiah College,qito rakavi sara tale tiko ga ena timi ni nodratou koronivuli na i wasewase ena Under 16 ena gauna qo.
Talanoa ni marama na tinana,e suka mai o Ratu ena dua na siga ni vuli ena macawa sa oti,ka kerea vei nona vua ke rawa ni dua na nona i vava ni qito,sega ni rawata rawa o rau na veitinani e dua,ka sa mani kerea o gone e dua ga na nona i tokani me vakayagataka nona i vava ena qito ena macawa sa oti.
Oti na qito ena macawa sa oti,rau mani veitalanoa na veitinani.kaya sara o nona Na vei Ratu,Luvequ mai muri ke sa lavaki tale mai e dua na mataqali ka va qo,nanuma tiko ni dou lewe levu,ka liga i dua taki tiko ga na veisusu,qai tovolea mo rai vaka ga e dua na marama dau ni bisinisi,se o na rawa ni rawata vakacava na nomu i sau ni vava ni qito,baleta na gauna qo ni dou lewe 9 taucoko na veitacini.
Ia, ena macawa sa oti a mani daro na nodra qito o Ratu ena vuku ni draki suasua,ka mani gole tu vata kei nona Na i na makete me rau laki volivoli.Sega ni kila o Nana ni o Ratu e vakarautaka tale toka ga yani e dua na nona “shopping list” me na mai cakava e dua na kakana me volitaka me rawa kina na i sau ni nona i vava ni qito,ka yaca ni nona kakana ena vakarautaka na “KUSIMA PACK”,mani volia sara na marama tinana na veika e vinakata o Ratu.
Oti nodrau volivoli me rau sa gole i vale,rau ciqoma sara e dua na qiri mai vua e dua na nodratou i tokani,vakarau tiko me gole i cakacaka,sa mani kerea sara me na volia ruarua na Kusima Pack,ka tauya $60 ni dua.
Volia rawa sara o Ratu na nona i vava ni qito,ka namaki me sa na vakayagataka ena qito ena macawa qo,sa na marautaka sara ni kila ni a ogataka sara tale ga na kena voli rawa.
Sa tuvatuva sara o Ratu me na cakava tiko na KUSIMA PACK ena vei Vakarauwai,me na rawa ni volia ga na veika e vinakata me rawata kina nona tatadra.
E sega ni dua na ka e dredre,ke sa tiko kina na gagadre ni sasaga me baleta na nomu tatadra.
Ivurevure:Tent 9-Lovo Queen
