Ena vuvu ga na wai kevaka eda tu vata.
Written by Atu Kurumudu on July 20, 2023
Oqori saraga na veika era sa raica tiko na lewe ni timi ni Rakavi ni Northland kara keba tiko mai Savusavu ena gauna oqo. Ena veitalanoa kei Savenaca Meca na manidia ni timi ena Vitifm ena mataka nikua, e vakaraitaka tiko kina o koya na nodratou sikovi tiko yani na timi kei iratou na kena ivakalesilesi. Era gole yani na luvei Tailevu kei na kena veiwekani era tiko mai Vanualevu raraba mera laki tokona tiko na nodra timi ka sa macawa dua voli na nodra tiko mai Savusavu ena gauna oqo.
Laki veisiko talega yani o Avichal ka dau tu ga e Waidalice ka sa cakacaka tiko vaka idinia ena FRA Savusavu.
Era veisiko talega yani na ivakalesilesi vakamatanitu e Savusavu ena icoi ni ti kana vinaka. Gole talega na vakavinavinaka kina vanua vakaturaga o Savudrodro ena vuku ni yalosavu ena nodra nanumi tu na timi ni Vualiku kei Tailevu.
Na ikuri ni yalo vinaka eratou vakaraitaka na lewe ni lotu ena Bethany AOG e Savusavu ena nodratou bolea me ratou vakani ira tiko na lewe ni timi ni Un 20 ni Northland me yacova na siga Vakaraubuka.
Vakadeitaka talega o Savenaca Meca nira sokowasa sara mai na gone ni Tailevu era tiko mai Taveuni mera mai tauca tiko na nodra kani veisiko vei ira na cauravou. Vagolea talega na nona vakavinavinaka o Save kina koro ko Votua , Lekutu ,Bua ena nodratou a mai tiko talega kina kei na veiqaravi levu era vakayacora vei iratou na wekadratou mai na Vualiku kei Tailevu.
Rau na sota tiko na timi veiwekani e rua – Northland kei Cakaudrove ena Vodafone Vanua challenge ena mua ni macawa oqo. Vakadeitaka na turaga manidia , ni na qai mai sogoti tiko na sokowasa kei na qito ena dua na Kava Barrel vakaivua ni oti mai na qito kana vakayacori ga ena hall ni koro totoka ko Yaroi. Mena qai dina kina na ivosa-vosa oya – E dau Nice ga o Vanualevu.
source:Vitifm
Pic credit:Vualiku kei Tailevu Nation
