MAI NA WATER BOY KINA RUGBY WORLD CUP-RAVUTAUMADA.
Written by Mika Qalobula on September 4, 2023
E tukuna o Makarita Savai na tinai Selestino Ravutaumada na wing ni timi ni Viti ki na World Cup oya ni dau tu na gagadre kivua na luvena ena gauna e se dau vakamuria tu kina na timi ni nodratou koro oya me tamata dau qito rakavi.
E tukuna o Savai ni dau sarava votu na gagadre nei Sitino ena gauna e dau vakaitavitaki koya kina me water boy ena nodratou timi ena gauna ese vuli tiko kina ena primary school.
E tukuna okoya ena gauna e vakatarogi tiko kina ena neitou Tabana ni rogo ena fijivillage ni dau sotava vakalevu o Ravutaumada na dredre ka vu mai ena nodrau a veibiu nai tubutubu, ia e tomana tikoga na nona sasaga na cauravou oqo me yacova na vanua esa tu kina ena gauna oqo.
E tukuna ni rau a sega ni tarova rawa na wai ni matadrau kei tinai Iosefo Masi ena gauna esa kacivaki kina na yacadrau na nodrau cauravou ki na timi ni Flying Fijians ki na Rugby World Cup.
E tomana o Savai ni dua na gauna ea vakaraitaka tiko o Stino kivua na tuakana o Aselemo Ravutaumada koya ka lewe na timi ni U19 ni Viti ena sotasota ni qito rakavi saumi, oya ni na dua na gauna ena matataka okoya na noda vanua ki na dua na qito levu.
E tekivu na nona qito o Ravutaumada ena nona matataki Taveuni ena sotasota ni Milo Kaji ena Under 9 ki na U14.
Ea qai tomana o Ravutaumada na nona qito ena nona sa gole mai ki Suva ena yabaki 2015 ka mai vuli sara ena koronivuli na Marist Brothers High School me yacova na kena qai soli vua e dua na sikolasivi ni oti na nona qito ena Under-15 ni Vodafone Super Deans ka qai lai vakacava vuli yani ki Niusiladi ka laki lewe ni timi ni Chiefs Under-18 ena nona se tiko mai Waikato.
Ea qai laki konitaraki ki na timi ni NZ Warriors o Ravutaumada me 2 na yabaki mai na yabaki 2019 kei na yabaki 2020.
Ea qai laki lewena talega na kalavo na GPS Rugby Club mai Ositerelia ni bera ni qai sainitaka na nona konitaraki kei na timi ni Drua ena yabaki sa oti.
Esa vakauta tale tikoga na marama na tinai Ravutaumada na nona vakanuinui vinaka kei na nodra vakanuinui vinaka na lewe ni koro e Naselesele vei iratou na cauravou lewe ni timi ni Viti ena vuku ni qito eratou sa vakanamata kina.
VITI FM 92/92.2/92.4/92.6-E KAMICA QAI KACHI!
I VUREVURE-FIJI VILLAGE.
