SERE VOU- GALILI-MATASERE-ERIC NADRAU

Written by Mika Qalobula on February 23, 2024

ERIC NADRAU-Na cauravou e vola ka lagata na sere vou oqo na “GALILI” , ka cavu tu mai na Koro o Nadrau e na loma ni yasana o Navosa. E katona na sere oqo o Freddy Suka e na volau ni katokatoni na Dege Studio , ka katoni na sere oqo e na yabaki saraga oqo.

GALILI-Na sere oqo na “Galili” e talanoataki tiko kina na nodrau veidomoni toka e dua na Cauravou kei na dua na Goneyalewa , ka rau veiraici voli ga e na volamata me vaka ni rau tu veiyawaki tu.

E na dua na loma ni bogi e toka voli na cauravou oqo ,ka vaka e ologi koya vakasauri e dua na mosi ni yalo ,ka yaco sara me tuturu kina na wai ni matana, oqo e na levu saraga ni nona nanumi Goneyalewa ,ka diva toka na cauravou oqo, me ya tiko voli e yasana o Goneyalewa e na gauna saraga koya.

E dua na “Galili” ni bula qai vakaciriloloma e lako curuma toka na cauravou oqo, Ia e sega ni cegu nodrau veiqiriti kei na nodrau veisemati voli toka e na mona livaliva me vakaseavu tu ni galili. E dua na vosa qai tukuna na cauravou vei gone yalewa oqo, ka biu toka e na karua ni qaqana.

” Vei senikau au sarava, ra sereka tu na dui roka, o iko ga, au mateca, niko rui totoka”

E na i otioti ni qaqa ni sere oqo, e yalataka kina o cauravou se cava na yawa ni vanua, e sega ni qai vakasuka na nona domoni goneyalewa, ka dina talega ni levu tu na ika e wasawasa, ia e kamica ga o goneyalewa ya.