Takoso ko Joe Schmidt ki Ositerelia.

Ena dua na itukutuku ka tabaki ena Wide World of Sports a tukuni kina ni vakabauti tiko mena digitaki o Joe Schmidt kina itutu vaka coach ni Wallabies.

Schimidt yabaki 58 , a dauniveivakatavulici ni timi ni Ireland ena maliwa ni 2013 kina 2019.

Ena ruku ni nona veiliutaki , qaqa vaka 3 ena sotasota ni Six Nations ka wili kina na grand slam.

Mai liutaka talega ni timi ni Ireland na world ranking ena nona mai taukena nai tutu ni naba dua ni oti nodratou mai vakadruka na timi ni All Blacks ena 2016 kei na 2018.

Kilai tani na turaga oqo na nona dau vakabibitaka na veika lalai kei na titobu ni kila vaka rakavi e tiko vua. A lesu tale mai Niusiladi ka mai lewena voli na keba ni Blues ni bera ni kacivi ena me veituberi ena timi ni All Black ena 2022.

Laurai saraga na veisau kina timi ni All Blacks ena nona mai tiko voli o Schmidt ka rau mai duavata voli kei Jason Ryan me rau vukei Ian Foster ka laki yacova sara na All Blacks na fainala levu ni 2023 Rugby World Cup.

source:nine.com.au