VEIVAKASALATAKI TIKO NA MATA TIMI NI DRUA KI VEI IRA NA GONE E NA SIGATABU NI GONE NIKUA

E na kena marautaki e na siga nikua na Sigatabu ni gone, e ratou sa veivakasalataki tiko kivei kemuni na gone-lalai e na noda vanua na timi ni Swire Shipping Fijian Drua, mo ni dau goleva, ka sasagataka vakaukauwa na veika o ni dau tatadrataka tu.

E na nodratou I tukutuku ni siga tabu ni gone, vakaraitaka tiko na dauniveivakatavulici ni timi o Mick Byrne ni dodonu meda dau vakayaloqaqataki ira na luveda mera dau tatadra na veika vinaka, ka mera dau gugumatua e na veika e ra vakaitavitaki ira kina. E tukuna o Byrne, ni marautaka na nodra yalo-mamarau na gone ni viti, ka dodonu mera marautaka na nodra bula.

E na gauna e tarogi kina me baleta na nodratou vukea na nodra mai sara qito o ira na gone mai na St Tabitha Home mai Saweni, Lautoka, tukuna o Byrne ni o ira oqo na nodratou dauniveitokoni, ka dodonu mera dau vukei.